Lettre DCCCXC. Au Comte Prosper-Marc de Tournon

Un cadeau du Saint. - Les plaintes de Berthelot contre Janus de Sales, sujet de mortification pour l'Evêque.

Annecy, 14 juin 1613.

Monsieur,

Je vous remercie de la part qu'il vous plait me faire de vos nouvelles, que je mesnageray tous-jours le plus discrettement que je pourray. Vous aures les primices du vin grec de Monpelier , lesquelles, puysque j'avois destinees a monsieur le Marquis de Lans, nostre gouverneur general , se rencontreront a propos entre vos mains pour luy estre donnees, bien que je ne me veuille pas pour cela exempter de luy envoyer les secondes traittes, desquelles aussi, peut estre, reciproquement vous fera-il part.

Mes freres sont tous vos serviteurs et se rendront tousjours pour vous suivre par tout ; mais voyla Bernardet qui me dit qu'il n'est plus tems pour ce coup , puysque Son Excellence part soudain apres disné, estant arrivee des ce soir passé .

Je suis sans nouvelles de monsieur de Charmoysi nostre cousin, et ce sont bonnes nouvelles, car sil y en avoit d'autres je serois adverti. Or, j'attens tous les jours l'ordre de sa liberté que Monseigneur de Nemours m'a promis ; c'est pourquoy je ne luy envoye point jusques a ce que je l'aye. A ce propos, on m'a dit que le sieur Bertelot avoit fait faire des grandes plaintes contre mon frere le chevalier a Son Excellence, mays il se treuvera que c'est a tort et pour des frivoleries : comme de ne le saluer pas, non plus qu'il n'est pas salué de luy, et semblables choses indifferentes et dont les plaintes peuvent estre reciproques, quoy que non egales en l'inegalité des personnes. Nous sommes icy en occupation pour telles petites observations, et cela me tient lieu de mortification, car en verite, j'aurois bien d'autres choses a faire qui seroyent plus utiles.

Je prie Dieu quil vous comble de benedictions, et suis sans fin,

Monsieur,

Vostre tres humble serviteur,

FRANçs, E. de Geneve.

XIIII juin 1613, a Neci.

A Monsieur

Monsieur le Comte de Tornon.

Revu sur l'Autographe appartenant à Mme la marquise Pensa, à Turin.