Lettre DCCCLXXXIV. À Madame de la Valbonne

(INÉDITE)

Une âme dévoyée: pourquoi les " Dames de la Visitation " ne sont pas répréhensibles de l'avoir assistée. - Quand faut-il empêcher le mal. Messages et souhait.

Annecy, [7 ou 8 juin] 1613 .

La femme delaquelle vous m'escrives , m'a donné un desplaysir extremement sensible, ma tres chere Fille, d'estre allee en un lieu ou elle ne pouvoit estre sans donner un tres grand scandale. Pendant le Caresme, elle s'estoit fort bien comportee , et je commençois a prendre de la consolation en son bonheur. Despuis, je ne l'ay point veuë, sinon a son despart pour Belley, qu'elle vint ceans, mais en une occurrence qui m'empescha de luy pouvoir parler a souhait parce que j'estois plein de gens.

Le monde a tort de prendre a contrepoil l'office de charité que les Dames de la Visitation ont cuidé faire en son endroit. Dieu a caché le secret des choses a venir aux hommes, et si nous ne devions servir sinon les ames qui doivent perseverer, nous serions bien en peyne comme les discerner d'avec les autres. Il faut, quand ce ne serait que pour une heure, empescher le mal du prochain. Et pleust a Dieu que cette pauvre femme fust demeuree dans les resolutions qu'elle avoit prises a la Visitation ! elle eust esté bien heureuse et de bonne odeur a tous les bons. Je dis cecy affin que vous sçachies respondre doucement a ceux qui murmurent.

Au reste, ma tres chere Fille, je me res-jouis de la santé de Mme de Monthoux et luy souhaite toute sainte benediction. Je n'escris pas a Mme la Generale , mais puis qu'elle se confie en vous, vous luy dires que cette creature s'en est allee a Belley, et espere qu'elle ne reviendra plus que pour amasser ses hardes et se retirer du tout.

Mais vous, ma tres chere Fille, vives tous-jours toute a Dieu, qui vous y a tant obligee par les graces et instructions quil vous a departies ; et je suis, d'un cœur parfait,

Vostre plus humble oncle et serviteur,

FRANçs, E. de Geneve.

A Madame de la Valbonne.

Revu sur une ancienne copie conservée à la Visitation de Turin.