Lettre CMLXXIV. Au Duc de Savoie, Charles-Emmanuel 1er

(MINUTE)

Un moyen d'accroître la dévotion au pays du Chablais. - L'abbaye de Ripaille et la piété des princes de Savoie. - Fermeté et constance de l'Ordre des Chartreux.

Annecy, 12 juin 1614.

Monseigneur,

Lhors que j'eu l'honneur de faire la reverence a Vostre Altesse il y a un an , je luy proposay de faire loger les RR. Peres Chartreux en l'abbaye de Filly en Chablaix , pour l'accroissement de la devotion qu'un si saint Ordre feroit en ce païs la et pour l'ornement que la reparation d'une abbaye si remarquable y apporteroit. Mays du despuis, ayant sceu que Vostre Altesse avoit jetté ses yeux et son desir sur Ripaille pour le mesme effect, je m'en suis infiniment res-joui; et en toute humilité je la supplie d'en ordonner au plus tost l'execution, affin que nous voyons en nos jours la pieté restablie en un lieu qui a esté rendu tant signalé par celle que Messeigneurs les predecesseurs mesmes de Vostre Altesse y ont si saintement et honnorablement prattiquee ; asseurant qu'en meilleures mains le genereux et pieux dessein de cette restauration ne pourroit estre confié, qu'en celles d'un Ordre si ferme et constant comme est celuy des Chartreux, lequel, ayant tous-jours esté des son commencement fort obligé a la serenissime Mayson de Vostre Altesse, luy a aussi reciproquement tous-jours esté et est tres affectionné et dedié.

Et tandis, je continue a supplier incessamment la divine Majesté qu'elle respande a jamais toutes ses plus cheres benedictions sur la personne et la couronne de Vostre Altesse, de laquelle je suis,

Monseigneur,

Tres humble, tres obeissant et tres fidele

orateur et serviteur,

FRANçs, E. de Geneve.

A Neci, le 12 juin 1614.