Lettre CMXCI. À Madame de la Fléchère

Affaires diverses. - Un malade bien résigné. - La seule chose digne d'être estimée .

Annecy, 19 août 1614.

Helas, ma tres chere Fille, que dires vous de ce pere qui tarde tant a respondre ? Certes, ce n'est pas faute de memoyre, et moins de volonté, mays j'ay un peu douté ou vous esties jusques des il y a trois jours, que je sçai que vous estes la .

J'escris donq a M. le Premier selon vostre desir, bien que je sache combien peu vous aves besoin d'intercession aupres de luy qui vous honnore tant.

Vous treuveres la lettre ci jointe d'un peu longue datte, mays il ny a remede; nostre bonne Mere qui l'escrit, ne me voit point sans que nous parlions de vous comme de celle qui nous ayme tant.

Le pauvre M. de Charmoysi est tous-jours entre les mains des medecins, sans voir goute, mais avec bonne esperance de voir, Dieu aydant. Il fait merveilles a se resigner a la volonté de Dieu, ainsy que la petite cousine m'escrit.

Ma tres chere Fille, en fin, de quel costé que nous nous retournions, nous ne treuverons rien digne d'estre estimé que la grace de Nostre Seigneur, a laquelle je ne cesse point de vous recommander, comme estant tres parfaitement vostre et

Vostre plus humble serviteur et compere.

La seur et la niece de deça se portent bien

XIX aoust 1614.

A Madame

Madame de la Flechere.

Revu sur une copie déclarée authentique, conservée à Turin, Archives de l'Etat.