Lettre MLXXXVIII. À la Mère de Chantal, a Lyon

L'anniversaire d'une vocation. - Une race spirituelle que le Saint demande à Dieu de multiplier. - Actions de grâces à la divine Trinité.

Annecy, [14 juin 1615 ]

A mesme que la tres souveraine bonté de la divine Trinité renvoye l'Esprit de son adoration en la sainte Eglise, elle renouvelle, ce me semble, celuy de la sacree vocation de ma tres chere, tres bonne et tres honnoree Mere, laquelle sortant de son païs sans sçavoir ou elle alloit, mais croyant a Dieu qui luy avoit dit : Sors de ta terre et de ton parentage ( Gn 12,1 ), elle vint en la montagne qui avoit pour son nom: Dieu la verra ; et Dieu l'a veüe, multipliant sa race spirituelle comme les estoiles du ciel ( Gn 22,14 ).

O ! Dieu soit a jamais glorifié, ma tres chere Mere, avec laquelle je me res-jouis, ains au cœur de laquelle mon cœur se res-jouit comme en soy mesme. 0 qu'il soit, ce cœur de ma Mere, eternellement fiché au Ciel comme une belle estoile qui en ayt une grande trouppe autour. Est-il possible que nous chantions eternellement le cantique de gloire au Pere, au Filz, au Saint Esprit ? Ouy, l'ame de ma Mere le chantera es siecles des siecles. Amen. Et Dieu en sera beni en l'eternité des eternités. Amen. VIVE JESUS

Gloire soit au Pere, au Filz et au Saint Esprit, de l'assemblee qu'il a faite de tous ces cœurs pour son honneur ; mais, helas ! que de confusion pour le mien qui a si peu fidelement cooperé a une si sainte besoigne ! Or sus, cette mesme tressainte Trinité, qui est une tres souveraine bonté, nous sera propice, et nous ferons des-ormais sa volonté.

Amen.

FRANÇs, E. de Geneve.