Lettre MC. À Monseigneur Pierre Fenouillet Éveque de Montpellier ( L4, Note 11 )

(INÉDITE)

L'importunité des grandes villes. - La paix après la guerre; courage militaire des princes de Savoie et de la noblesse savoyarde; force veuves et orphelins.

Annecy, 15 juillet 1615.

Monseigneur,

Convié par Monseigneur l'Archevesque de Lion, j'ay esté aupres de luy ces jours passés, et pensois bien de la vous bayser les mains, comme je fay maintenant tres humblement par lettre ; mais je n'en eus jamais le loysir, a cause de l'empressement des visit... et visitare.

Certes, ces grandes villes sont importunes pour cela, au moins pour les pauvres villageois comme moy, qui n'y sont pas accoustumés. Mais, si je n'ay peu vous escrire, je n'ay pas laissé de parler souvent de vous avec ce digne Prelat, qui certes tesmoigne de vous honnorer et estimer grandement; en quoy je prenois grand playsir, comme vous pouves penser.

Au reste, nous voyci dans la paix, graces a Dieu, que je supplie la vouloir rendre longue et heureuse . La guerre a esté courte, mais aspre tout ce qui se peut , et ou Son Altesse et les Princes ses enfans ont fait paroistre leur vertu originaire des anciens Amé et Thomas . Nous y avons perdu plusieurs braves gentilzhommes savoyards , car nostre nation a esté la plus employee et s'est grandement signalee en cette occasion ; de sorte que nous avons force vefves et orphelins, desquelz les vœux rendront la paix durable.

Je prie la divine Bonté qu'elle vous comble de ses plus cheres faveurs, et suis immortellement,

Monseigneur,

Vostre tres humble et tres obeissant frere et serviteur,

FRANÇs, E. de Geneve.

15 julliet 1615, Annessi.

Revu sur une ancienne copie, conservée à la Visitation de Montpellier .