Lettre MXCIX. À la Mère de Chantal, a Lyon

Le retour de l'Evêque de Genève à Annecy; la présidente Le Blanc l'accompagne à Saint-Priest. - Mme de Travernay à l'article de la mort ; une petite histoire villageoise.

Annecy, 14 juillet 1615.

Par cette premiere commodité, je vous rens conte de nostre voyage, ma tres chere Mere. Certes, quand Monsieur l'Archevesque me laissa , il me tesmoigna beaucoup d'amitié. Or, je cultiveray la faveur que ce grand Prelat me fait, le plus soigneusement qu'il me sera possible.

Nous vinsmes donq ce jour-la a Saint Prix , et tousjours avec la bonne madame la Presidente [ Le Blanc ] qui m'ouvrit son cœur, autant que l'occasion le luy permit, fort franchement. C'est un bon cœur, en verité, et auquel je souhaitte beaucoup de vraye prosperité. Elle a grand besoin d'estre assistee et appuyee bien doucement, pour la multitude des travaux que la vivacité de son esprit luy donne, qui ne cesse guere de luy fournir des motifz pour aggrandir son mal . Elle demanda congé a Monseigneur l'Archevesque d'entrer vers vous, lequel le luy accorda, et luy donna mesme esperance de luy permettre . d'y coucher . Quand cela arrivera, aydés-la bien, ma tres chere Mere, car elle le merite et en a besoin. Si elle vient icy l'annee prochaine, comme elle en a fait le dessein , alhors nous aurons plus de moyens de la bien consoler. Je vous escriray un petit billet a part affin qu'elle le voye, ayant bien du desir qu'elle sache que je la cheris et estime, pour la plus grande gloire de Dieu.

J'arrivay samedy a Sessel , ou je preschay le dimanche matin, et vins coucher en cette ville, et treuvay a mon arrivee nouvelles que madame de Treverney estoit en l'article de la mort. Je partis hier de grand matin pour luy rendre mon dernier devoir, puisqu'elle estoit de mes filles. A mon arrivee, elle s'eslança a mon col avec une joye bien extraordinaire a son humeur melancholique, elle qui jamais ne me fit aucune caresse. En somme elle se remit tellement, qu'encor que je ne pense pas qu'elle la fasse longue, si est-ce que je pense qu'elle vivra encor plusieurs jours .

Elle se confessa derechef a moy, pour sa consolation et non par necessité, car elle avoit receu le jour precedent tous ses Sacremens, et mesme l'Extreme Onction, et fit la plus absoluë indifference que j'aye jamais veuë ; car ses domestiques et voysins la pressant de faire des vœux pour guerir, jamais elle ne voulut, mays dit que ce que Dieu ferait luy serait le plus aggreable et qu'elle ne voudroit pas, par le moindre desir du monde, demander a Dieu ni la vie ni la mort, luy laissant sans reserve sa vie entre ses mains, pour en faire a son gré ; et ce qu'il luy plairoit seroit aussi ce qu'elle vouloit. Mais elle disoit cela si fermement, que je voyois clairement que c'estoit tout de bon que ce luy estoit tout un. Et, bien qu'elle dist que sa Françon, ma filleule , luy touchoit un peu le cœur parce qu'elle estoit encor si petite, neanmoins elle adjoustoit, non seulement avec force, mays avec tendreté, que si Dieu la retiroit, il sçavoit bien ce qu'il feroit de cette fille, et que, pour elle, elle ne vouloit nullement desirer de vivre, sinon tout ainsy que Dieu le voudroit. En somme, je luy dis ce que je sceu, et tout a son gré. Je la laissay en paix, sans apparence de mal, sans plainte, sans tesmoigner aucune sorte de passion, sinon de revoir son mary , qui estoit la seconde chose qu'elle avoit desiré avant son trespas. Ces petites histoires villageoises me playsent et m'edifient, et c'est pourquoy je vous les raconte.

J'escris a Monseigneur l'Archevesque par honneur.

Ma tres chere Mere, je suis, comme vous sçaves vous mesme, tout vostre, sans reserve ni difference quelcomque. Vivés toute genereusement et noblement joyeuse en Celuy qui est nostre unique joye. Je salue du fond de mon cœur ma tres chere fille ma Mere et mes cheres filles , avec nos cheres Novices , entre lesquelles je cheris particulierement ma Sœur Françoise Hieronime ma cousine, parce qu'elle est la cadette de Lion.

A Dieu, ma tres chere Mere, le doux Jesus soit a jamais nostre vie.

Amen.

FRANÇs, E. de Geneve

Le 14 julliet 1615.