Lettre MXCVIII. Au Supérieur d'Une Communauté

Charité compatissante du Saint en faveur d'un Religieux expulsé de son Ordre.

Annecy, 13 juillet 1615 .

Mon Reverend Pere,

Le Frere N. vint a moy au plus fort de son affliction , et puis dire qu'il estoit plus mort que vif, tant sa desolation estoit extreme ; et je me resouvins de Celuy qui ( Is 42, 3 ; Mt 12,20 ) n'éteint

pas la mèche encore fumante et qui ne broie pas ce qui est brisé. Il me presenta ses patentes de demission, ejection et expulsion de l'Ordre, et, par ses larmes, impetra aysement de moy le sejour de quelques semaines en ce diocese, pendant lesquelles je fus a Lion pour y visiter Monseigneur l'Archevesque, chez lequel le R. P. V. me parla. Et pour dire ma pensee, il me parla selon mon cœur, car il me recommanda ce pauvre homme, prestre et lié par les vœux de Religion, affin qu'il fust aucunement consolé.

Despuis, je fis encor plus volontier ce que je voulois faire en charité autour de cette ame. Mais, mon Reverend Pere , ç'a tous-jours esté avec cette reserve, qu'elle respecteroit et honnoreroit en toutes occurrences vostre Ordre, et se comporteroit humblement envers tous ceux qui en sont. Et sur vostre advertissement, je tiendray encor plus fortement la main sur luy pour cela, tandis qu'il demeurera dans mon diocese, ne desirant rien tant que de donner satisfaction aux Religieux, et particulierement a ceux de vostre condition.

Mays, mon Reverend Pere , vous me proposes le retour de cette brebis en vostre parc. Je croy qu'elle ne desireroit pas mieux, et sur

tout, s'il vous plaisoit de l'asseurer que vous favoriseries sa bonne intention de quelque doux accueil et de quelque moderation en la penitence que peut estre vos Constitutions ordonnent a ceux qui reviennent. Que si vous prenes le soin de me tenir adverti de vostre volonté pour ce regard, je coopereray a ce bon œuvre de tout mon cœur; duquel vous saluant bien humblement et vous souhaittant toute sainte benediction, je demeure,

Mon Reverend Pere ,

Vostre tres humble frere et serviteur

en Nostre Seigneur,

FRANCs, E. de Geneve.

D'Annessi, ce 13 julliet....