Lettre MCMLIV. À la Mère de Chantal, a Dijon

Projet d'itinéraire pour la Mère de Chantal; désir du Fondateur qu'elle visite les nouvelles Maisons. - Pourquoi il ne peut écrire longuement. - Salutations.

Annecy, 22 octobre 1622.

Voyes, je vous prie, vous mesme, ma tres bonne et tres chere Mere, les lettres ci jointes, et voyes s'il y a apparence que, sans vous incommoder beaucoup, vous puissies donner ce contentement tant desiré a ces cheres ames ; car, si cela se peut bonnement, pour moy, non seulement j'y consens, mais je le souhaiterois tres volontier, sur tout s'il est vray que venant de Dijon a Monferrant, ce fust vostre passage de voir vostre chere fille ; et encor plus, si venant de Monferrant a Lion, c'estoit vostre passage de voir Saint Estienne de Forez . Et je confesse que ce me seroit de la consolation de sçavoir des nouvelles de ces nouvelles plantes que Dieu, ce me semble, a plantees de sa main pour son plus grand honneur et service.

……………………………………………………………………………

Or sus, je croy qu'un bon moys ou cinq semaines feront la rayson de tous ces destours ); mais j'entens tous-jours qu'il n'y ayt point de peril des gens d'armes sur les chemins de ces lieux la .

Apres quoy, nous vous dirons pourquoy et comme a present je n'ay nul moyen d'escrire davantage, quoy que je me porte bien, graces a Dieu. Ce porteur, d'un costé, me presse infiniment, affin qu'il vous puisse treuver a Dijon ; d'ailleurs, on me presse aussi pour d'autres bonnes affaires, lesquelles je ne puis abandonner. Tout se porte bien icy, et je suis de plus en plus

Vostre tres humble et invariable [Père ], filz et serviteur,

FRANçs, E. de Geneve.

Le 22 octobre 1622, Annessi.

Je vous supplie de saluer vos bonnes vefves ; je ne sçay pas leur nom. J'espere en la misericorde de Dieu que je sçauray au Ciel comme on les nommera, du nom que tous sçauront, et que personne ne sçaura, sinon celuy qui le recevra ( Ap 2,17 ).