Capitulum 10

Remedia contra tristitiam.

PERNICIOSISSIMAM ergo hanc tristitiæ passionem ita de nobis expellere possumus, si mentem nostram jugiter occupemus spirituali meditatione, futurorumque spe et repromissæ beatitudinis contemplatione, ad illa erigentes cor nostrum. Hoc etenim modo valebimus superare universa tristitiarum genera : sive quæ ex præcedenti ira descendunt, sive quæ veniunt ex lucri amissione, aut detrimenti seu damni illatione, vel quæ ex irrogata injuria generantur, sive quæ de irrationabili mentis confusione procedunt, sive quæ mortiferam desperationem nobis inducunt; quum scilicet intuitu rerum æternarum ac futurarum semper læti atque immobiles perdurantes, nec casibus adversis dejicimur, nec prosperis elevamur, utraque contemplantes tanquam mox transeuntia et caduca.