Caput II. De primo angelo, et tuba ejus.

Et primus angelus tuba cecinit, et facta est grando et ignis mista in sanguine, et missum est in terram, et tertia pars terrae combusta est, et tertia pars arborum combusta est, et omne fenum viride combustum est (Apoc. VIII). Primus angelus, praedicatorum ordo primus; prima tuba, praedicatio prima. Primus ergo angelus tuba cecinit, quando in Novo Testamento ordo praedicatorum primus in Judaea Evangelium personuit. Sed quid ipsam praedicationem secutum sit declaratur cum subditur: Et facta est grando et ignis mista in sanguine. Grando significat extrinsecus flagellum persecutionis. Ignis flammam interius ardentis perversae aemulationis. Sanguis crudelitatem occisionis. Primo itaque angelo, tuba canente, facta est grando, et ignis commista in sanguine; quia, primo praedicatorum ordine in principio Novi Testamenti in Judaea praedicante, Judaicus populus usque ad effusionem sanguinis crudeliter exarsit in persecutione. Et missum est in terra, id est in illos qui habitant in terra. Sed quia saevitia persecutionis non bonis, sed malis nocet, apte subjungitur: Et tertia pars terrae combusta est, et tertia pars arborum combusta est, et omne fenum viride combustum est. Duae hominum partes sunt Dei, activi scilicet, et contemplativi, imperfecti et perfecti, minores et majores. Istas duas partes Deus sibi assumit, quia pusillis cum majoribus benedixit. Tertia pars, quae est malorum, diabolo relicta est, et facta grandine, et igne commista in sanguine, duabus quae Dei sunt illaesis permanentibus combusta est, quia, praedicatorum ordine praedicante et persecutione saeviente, funditus a bono defraudata est. Terra autem significat homines, quia debent et ipsi ad similitudinem terrae per virtutes et bona opera fructificare. Arbores significant homines, quia sicut arbores, se desiderio coelestis boni sursum debent erigere. Fenum viride significat homines, quia, debent, quemadmodum fenum viride, per virtutem perseverantiae semper virere. Sed arborum et terrae tertia pars combusta perhibetur, ut duabus partibus quae, ut dictum est, Dei sunt illaesis a malo permanentibus, ipsa a vero bono sterilis dejecta marcida significetur. Fenum autem totum comburitur, quia quisquis solum crudelitatis virorem habet, et virtutum et operum bonorum fructu caret, veniente tentatione vel persecutione malignitatis incendio facile concrematur. Sed boni denique sive mali homines sub significatione trium rerum, terrae, arborum, feni, recte comprehenduntur, propter trium bonorum sive malorum typum, cogitationum videlicet, locutionum, actionum. Haec enim omnia in bonis bona sunt, in malis mala. Non inconvenienter itaque homines sive boni, sive mali per trium rerum describuntur significationem, quia et per trium distinguuntur qualitatem, et multa sunt quidem quae de hujusmodi intellectibus dici possunt. Sed quae sub praesenti brevitate comprehendere non valemus, ad exercitationem sensus tui, tuae prudentiae quaerenda et discutienda reservamus. Non enim debes hebes his tantum quae dicimus supersedere, sed temetipsum in anteriora extendere, et attemperare, remotiora attingere, majora comprehendere. Primus ergo angelus, praedicatorum ordo in Judaea praedicantium in Novo Testamento primus. Tuba prima, praedicatio prima. Grando et ignis commista in sanguine, aemula persecutio saeviens in credulitate; tertiae partis terrae, arborum, et totius feni viridis combustio, damnandorum reprobatio. Duarum partium terrae, et arborum servatio, salvandorum assumptio. Quorum videlicet salvandorum duae partes esse dicuntur, quia salvandi sub imperfectionis et perfectionis differentia comprehenduntur.