Lettre CXXXVI. À Monseigneur Claude de Granier, Évêque de Genève

Envoi de deux lettres. - Aggravation de la maladie de M. de Boisy,

Sales, 19 janvier 1601,

Monseigneur,

Sur la lettre que monsieur de Sanci m'escrivoit pour me rendre solliciteur aupres de vous de son intention, j'ay ouvert celle quil vous escrivoit, appuyé tant sur la creance qu'il vous plait prendre en la fidelité de l'affection que j'ay a vostre service, qu'aussi surla crainte que j'avois que ce ne fut pour chose qui meritast que j'allasse aupres de vous pour en entendre vos commandemens. Mais voyant que le sujet ne portoit point ceste presse, je vous envoye les deux lettres et demeure icy au devoir que j'ay au service de mon pere , lequel de jour a autre avance a grans pas a l'autre vie, s'affaiblissant tellement en cellecy que, si Dieu ne nous preste sa main miraculeuse, je me vois dans peu de jours privé de la consolation que, avec toute ceste mayson, j'ay tous-jours eu en la presence de ce bon pere . Or Dieu, qui est Seigneur de nos vies, soit a jamais loüé de toutes ses volontés.

Je le prieray tous-jours pour vostre prosperité, puysque j'ay cest honneur d'estre advoüé,

Monseigneur,

Vostre tres humble et tres obeissant filz et serviteur,

FRANçs DE SALES.

A Sales, ou ma mere avec tous les siens et mon pere mesme vous baysent tres humblement les sacrees mains, 19 janvier.

A Monseigneur

Monseigneur le Reverendissime Evesque et Prince de Geneve.

Revu sur une copie déclarée authentique conservée à la Visitation d'Annecy.