Lettre MDCCXXXIII. À Monseigneur Jean-François de Sales, son Frère Évêque Nommé de Chalcédoine

Désagrément causé par les neiges. - Un service à rendre à M. de la Pierre. - Métamorphose soudaine du sieur Bonfils. - Pourquoi l'Evêque de Genève cèle le plus qu'il peut la nouvelle d'une apostasie. - Bonne mine et bon jeu. - Maladies, mariage et mort. - Témoignages d'honneur et d'affection donnés par le Saint au nouvel Evêque de Chalcédoine.

Annecy, 8 décembre 1620.

L'aspreté du tems et la grandeur des neiges ont retenu comme par vive force le bon M. l'Abbé [jusques] a present , mon tres cher Frere ; et ce qui me desplait en ceci, c'est qu'il n'arrivera pas asses tost pour vous donner la commodité de nous faire jouir de vostre chere presence pour ces premieres festes . Mais il n'y a remede : il faut croire que, Nostre Seigneur le voulant ainsy, ce sera le mieux.

M. de la Pierre n'a sceu comprendre que Son Altesse eust quelque degoust de luy ; il dit qu'il sçait bien qu'elle l'ayme et sçaura bon gré a qui luy presentera sa lettre, qu'il vous prie de luy faire tenir seurement ; et se promet que, si vous en parles a M. Le Grand , il se chargera volontier de le faire, et qu'en cela il n'y a point de hasard. Que si cela se peut faire bonnement, ce me seroit un grand playsir de le contenter. Il en escrit a M. le Collateral , affin qu'il en confere avec vous.

J'escris a M. le Comte de Montmayeur , pour le remercier du soin qu'il eut de me faire tenir une de vos lettres tandis que j'estois en Fossigni. J'escris a M. Vito, me res-jouissant de le voir au service de Madame, nostre Maistresse .

Je vous pourrois dire un monde de nouvelles. Tenés aujourd'huy,…….pour toutes asseurances de la triomphante sortie de M. Bonfilz, qui est a mesme tems establi General des Finances, avec un si extreme credit que nul ne pourra plus vivre que par sa bonne grace . Toutefois, plusieurs ne veulent croire cette si soudaine metamorphose ; et, quant a moy, je ne diray sinon : peut estre qu'il est vray, et peut estre que non.

C'est une merveille qu'en ce païs on ne sçait encor point la deplorable adventure de M. de [Granier ] ; car, quant a moy, je la cele le plus que je puis, affin de n'infecter point l'air d'une si puante nouvelle. Quelle grace Dieu luy a faite de l'avoir reduit, par sa providence, dans la prison !

Mes freres sont tous-jours apres a faire descombrer la mine de laquelle plusieurs ont une grande opinion ( note 568 ) ; mais Dupra n'en peut rire, craignant qu'une si bonne mine ne soit pas accompaignee de bon jeu .

M. le Prevost eut un rude accident de fievre avant hier ; mais ce n'a esté qu'une fievre ephemeride, Dieu mercy. M. Perret est grandement malade ; et s'il mouroit, il y auroit danger qu'on impetrast sa place a Rome, comme ill'impetra luy mesme .

Ceux de Rumilly et le Curé ont receu leurs lettres avec toute obeissance religieuse ; que bien tost on leur face le bien pour lequel on retarde.

La Seur Marie se porte tres bien, avec grand playsir d'avoir l'habit .

Le bon M.l'Abbé nous oblige grandement a l'aymer, a l'estimer, a le servir, pour l'extreme affection qu'il nous tesmoigne avec toute sorte de confiance. C'est pourquoy je le vous recommande de tout mon cœur, et vous prie de me tenir en la bonne grace de madame de Sarsenas qu'on m'a dit estre grosse, dont je me res-jouis grandement.

Ce que M. de Vallon vous a escrit touchant le mariage de M. de Charmoysi avec la fille de M. de Montmayeur, m'empeschera de vous en faire un plus long recit .

M. l'Abbé de Six est en fin trespassé , et on m'a dit que M. l'Esleu ne demeure pas sans affaires avec les Religieux qui ne le veulent pas reconnoistre, parce qu'ilz croyent qu'il n'a pas ses permissions de Rome .

Je ne vous entretiendray pas davantage, ains me rapportant a la suffisance de M. le porteur, je vous saluë tres humblement, et, si vous estes consacré, je vous bayse les mains et la cime de vostre teste parfumee de l'onction sacree, que je supplie Nostre Seigneur de faire saintement des couler jusques a la robbe de cette Eglise, et que la rosee de vostre

Hermon ( Ps 132,2 ) soit heureusement transportee jusques en nostre sein. C'est aujourd'huy le jour anniversaire de mon sacre, par lequel je commence la dix neufviesme annee.

Je suis sans fin,

Vostre tres humble frere et serviteur,

FRANçs, E. de Geneve.

A nostre M. le Collateral que luy diray je ? Il sçaura que je suis parfaitement sien.

8 decembre 1620.

A Monseigneur l'Evesque de Chalcedoine,

premier Aumosnier de Madame.