Lettre MDCCXXXVIII. À Monseigneur Jean-François de Sales, son Frère Évêque Nommé de Chalcédoine

Préparatifs pour le voyage de France. - L'Evêque voudrait laisser son frère en sa place. - L'impossibilité où il se trouve d'aller jusqu'à Turin. - Insolence de deux laquais au logis de François de Sales ; démêlé qui en résulte entre M. de la Valbonne et le baron de Tournon. - Méthode pour garder la paix et gagner les cœurs. - Prises d'habit au Monastère d'Annecy.

Annecy, 28 décembre 1620.

Je n'ay encor point receu de commandement de Son Altesse pour le voyage de France, Monsieur mon tres cher Frere, ni ne sçai encor pas quel nombre de personnes je pourray mener. Ce pendant je me vay praeparant, affin de n'estre pas tout a fait surpris ; que si je puis vous laisser icy en ma place, je m'en iray bien plus joyeux.

Nostre monsieur le Collateral me conseille que, si je puis, j'aille voir comme Madame se porte bien et exerce plusieurs vertus dignes d'elle, affin d'en pouvoir parler plus particulierement au Roy et a la Reyne Mere ; mays je voy que je suis trop pressé pour prendre ce loysir-la, et sur tout en ce tems que les jours sont si cours, et faudroit une trop grande diligence ; car autrement, cela seroit fort a propos.

Voyla la lettre de monsieur de la Pierre, qui a receu asseurance, ainsy quil m'a fait voir, que Son Altesse l'ayme ; dequoy je ne doute point. Si donq vous le juges a propos, vous luy feres le bon office qu'il desire ( note 920 ).

Vous aures sceu ce qui s'est passé de la part de monsieur le Baron de Tornon envers monsieur de la Valbonne . Ce qui m'en desplait le plus, c'est le mespris de la justice, et que, sans ma coulpe, j'en aye esté l'occasion. Je ne sçai pourquoy, deux garçons de 20 ou 22 ans vindrent faire un' asses deshonneste insolence ceans, avec des huees et urlemens asses grans : l'un avoit esté laquay de Chappe l'aisné ; l'autre estoit palefrenier de monsieur le Baron de Tornon. Or, monsieur le President les fit saysir et emprisonner, et dans deux jours me les envoya pour me demander pardon, sans que ni d'effect ni de paroles on leur fit autre chastiment. Le jour suivant, monsieur le Baron de Tornon treuva le secretaire de monsieur le President et, luy sautant dessus, luy donna des coups de baston en luy disant : Tien, porte cela a ton maistre. Et bien que je ne sçai pas si ces paroles ont esté preuvees, si sçai-je bien qu'elles furent dites.

Je vous escris l'histoire seulement affin que vous la sachies, et par ce que monsieur le President a recouru a monsieur le Marquis de Saint Damien qui, peut estre, vous en parlera; affin que vous sachies que, quant a moy, je ne me suis nullement plaint, et avois de tres bon cœur pardonné l'insolence, laquelle fut sans doute faite de guet a pend et sans que j'aye jamais offencé ni les maistres ni les valetz ; mais je sçai de certaine science qu'il faut dissimuler beaucoup et mespriser toutes les offences qui le peuvent estre, et que, par cette methode, on garde la paix et en fin on gaigne les cœurs des plus inconsiderés. Seulement suys-je marri de ces deux gentishommes, qui prennent des habitudes si contraires a la courtoysie et generosité a laquelle leur naissance les obligent

(sic) envers la justice et tout le monde ; et je ne doute point que monsieur le Marquis ne les convie a faire quelque sorte de tesmoignage a monsieur le President, de desplaysir de l'avoir ainsy traitté.

Mays tout ceci, mesnages-le selon que vous jugeres a propos, car il ne faut pas d'une querelle faire des querelles ni rien dire ou faire qui puisse ennuyer monsieur le Marquis de Saint Damien, puis que il nous fait lhonneur de nous aymer et qu'il oblige chacun, par sa vertu, a lhonnorer. En somme, c'est cela qu'il faut faire pour fleurir et fructifier.

Mays voyla l'heure qui m'appelle pour me prreparer a la Messe, que je vay dire a la Visitation, pour donner l'habit a nostre Seur Marie et a madamoyselle de Servieres, niece de monsieur de Pezieu , avec lequel je disneray ceans, Dieu aydant. Dequoy nostre bon P. D. Juste sera bien ayse , et moy aussi, qui suis,

Monsieur mon Frere,

Vostre tres humble frere et serviteur,

FRANçs, E. de Geneve.

Jour des Innocens.

J'ay fait ce que monsieur l'Abbé mon cousin m'escrivit .a son depart , pour M. Mathieu , et feray ce qui me sera possible pour M. de Lea , estimant que je verray monsieur de Ballon, mon oncle, bientost , Mille salutations a nostre monsieur le Collateral qui m'excusera si je ne luy escris.

A Monseigneur

Monseigneur l'Evesque de Calcedoine,

premier Aumosnier de Madame.

Revu sur l'Autographe conservé dans l'église paroissiale de Castel-Viscardo, près Bolsena (Italie).