Praefatio

De Sacramentis bipartita Disputatio est. Primum enim generatim de omnibus. Deinde seorsim de singulis explicandum erit. Ac generalis quidem Disputatio duo habebit quasi prolegomena. Unum de erroribus circa Sacramenta. Alterum de mendaciis, et calumniis recentium haereticorum. Deinde sex continebit principales controversias. Unam de nomine, et significatione Sacramenti. Alteram de natura, et definitiond. Tertiam de causis tum intrinsecis, tum extrinsecis. Quartam de effectibus, id est, gratia, et charactere. Quintam de numero. Sextam de caeremoniis.

Scripserunt de hoc argumento plurimi, sed praecipui inter haereticos mihi videntur Lutherus in lib. de Captivit. Babylonica, et in assertione articulorum; Philippus in locis, et in Apologia Confessionis Augustanae; Joannes Calvinus lib. IV Institut. cap. 14. et seq, Martinus Kemnitius Tom. II Examinis Concil. Trid.

Ex nostris praeter Scholasticos in IV Sententiarum Thomas Waldensis Tom. II. toto; Gulielmus Parisiensis in lib. de Sacramentis; Joannes Eckius in homiliis de Sacramentis; Joannes Roffensis in refutatione articulorum Lutheri; Hosius Cardinalis in Confessione Polonica; Ruardus Tapper in explicatione articulorum Lovaniensium; Jodocus Tiletanus in refutatione examinis Kemnitii; Gulielmus Alanus in lib. de Sacramentis in genere; Gulielmus Lindanus in Panoplia lib. IV; Petrus Soto, de Institut. Sacerdotum. '