Capitulum 10

Revelatio de perfecto castitatis experimento.

UT autem probemus testimoniis veterum et divinis oraculis ea quæ diximus, referamus quid B. Paphnutius de puritatis gratia senserit, imo quid angeli revelatione cognoverit: quod tentabimus ex verbis et experimentis ipsius S. Paphnutii. Hic etenim multis annis tam præcipua vivit districtione, ut crederet se penitus absolutum a laqueis carnalis concupiscentiæ, eo quod sentiret se factum superiorem cunctis infestationibus dæmonum, contra quas diu et aperte conflixerat. Qui dum pararet pulmentum lenticulæ viris sanctis visitantibus eum, manus ejus læsa est in clibano flamma volitante, ut solet. Quo facto contristatus, cœpit magnifice secum revolvere, intra se dicens: Cur ignis non habet pacem mecum, quum graviora dæmonum prælia cessaverint mihi? aut qualiter ille inexstinguibilis ignis inquisitor omnium meritorum non tenebit me transiturum per se in illo metuendo judicii die, cui non pepercit extrinsecus

Itaque senex hac revelatione percussus, non attentavit signum experimentale sibi monstratum, sed conscientiam suam interrogans et puritatem cordis sui examinans, nec castimoniam suam tali probatione experiendam decernens aut judicans, dixit: Non est mirum, si præliis immundorum spirituum mihi cedentibus, senserim adhuc adversum me sævientis ignis adustiones, quas credebam durissimis dæmonum impugnationibus inferiores. Major namque est virtus et sublimior gratia exstinguere interiorem carnis libidinem, quam signo Domini et virtute Altissimi subjugare nequitias dæmonum extrinsecus irruentes, aut expellere dæmones de obsessis corporibus per invocationem Omnipotentis.

Hucusque abbas Nesteros collationem perducens de vera charismatum operatione, prosecutus est institutione suæ doctrinæ nos properantes ad cellam senis Joseph, quæ fere sex millibus distabat a cellula Nesterotis.