Capitulum 4

De cucullis monachorum.

SUNT præterea quædam in Ægyptiorum habitu monachorum magis ad morum informationem quam ad corporis necessitatem spectantia, per quæ simplicitatis ac innocentiæ observantia in ipsa qualitate vestitus eorum designetur ac teneatur. Indesinenter namque diebus ac noctibus utuntur cucullis permodicis usque ad cervices et superiorem humerorum partem extentis, eorumque capita tantum operientibus: quatenus innocentiam et simplicitatem parvulorum custodire admoneantur ex dispositione atque velamine habitus hujus; sicque reversi ad infantiam seu innocentiam Christi, cum affectu et virtute cunctis horis opportunis decantent: Domine, non est exaltatum cor meum, neque elati sunt oculi mei, etc.