Capitulum 8
De mafortibus eorum.
POST hæc, colla sua et humeros angusto tegunt palliolo, tam humilitatem amictus quam pretii parvitatem in hoc ipso sectantes: quæ palliola appellantur mafortes, tam nostro quam illorum eloquio. Sicque declinant et vitant planeticarum birrorumque pretia et ambitionem.
De melote et pelle caprina.
ULTIMO, habitus eorum est pellis caprina, quæ melotes vel pera vocatur; baculus quoque. Quæ gestant ad imitationem eorum qui monasticæ professionis virtutes præfiguraverunt in veteri Testamento. De quibus Apostolus : Circuierunt, inquit, in melotis, in pellibus caprinis, etc.1 Qui habitus pellis caprinæ significat eos debere in summa virtutum gravitate consistere, mortificata omni petulantia carnalium passionum; nec quidquam lasciviæ, aut caloris juventutis, seu pristinæ mobilitatis, in eorum corporibus residere.
Footnotes
-
Hebr.xi, 37. ↩
Chapter 8 of 279