Capitulum 6

De rebrachiatoriis eorum.

GESTANT etiam resticulas duplices laneo subtemine plexas, quas Græci ἀναβολάς vocant, nos vero succinctoria, seu redimicula, vel proprie rebrachiatoria possumus appellare. Quæ descendentes per summa cervicis et e lateribus colli divisæ, utrarumque alarum, hoc est amborum brachiorum, ambiunt sinus, et eos hinc inde succingunt: ut constringentes latitudinem vestimenti, illud ad corpus contrahant et conjungant; sicque constrictis brachiis, impigri et expediti ad omne opus monachale reddantur, illud præceptum Apostoli studentes tota virtute implere: Non solum mihi, sed et his qui mecum sunt, ministraverunt manus istæ.¹ Neque panem gratis ab aliquo manducavimus, sed in labore et fatigatione, die ac nocte operantes, ne quem vestrum gravaremus.² Et: Si quis non vult laborare, nec manducet.³