Skip to the text

Capitulum 5

De colobiis eorum.

COLOBIIS quoque lineis vix usque ad cubitorum extrema pertingentibus induti, nudas de reliquo portant manus: quatenus manicarum abscissio suggerat eis quod actus et opera mundi hujus amputata esse debeant ab ipsis; atque per indumentum linei velaminis doceantur quod ab omni conversatione terrena debeant esse mortificati, audiantque per hoc Apostolum quotidie eis dicentem:1 Mortificate membra vestra quæ sunt super terram. Illud etiam prætacto eorum habitu protestante, quod idem ait Apostolus, Mortui enim estis, et vita vestra abscondita est cum Christo in Deo;23 et iterum, Vivo autem, jam non ego, vivit vero in me Christus;4 itemque, Mihi mundus crucifixus est, et ego mundo.5

Footnotes

  1. Coloss. III, 5. ↩

  2. Galat. II, 20. ↩

  3. Coloss. iii, 3. ↩

  4. Ps. CXXX, 1. ↩

  5. Ps. VI, 14. ↩

Chapter 6 of 279