Capitulum 2
DE HABITU ÆGYPTIORUM MONACHORUM.
Proœmium.
DE institutis ac regulis monasteriorum dicturi, ab ipso habitu monachorum convenientius, Deo præstante, incipiemus. Interiorem namque monachorum ornatum et cultum tunc poterimus consequenter exponere, quum exteriorem eorum ornatum ac habitum descripserimus ad oculum.
De cingulo monachi.
ITAQUE monachum accinctis lumbis oportet semper incedere, tanquam militem Christi jugiter positum in procinctu spiritualis pugnæ christianæ militiæ.1 Sic enim quarto Regum legimus incessisse eos qui in veteri Testamento monasticæ professionis fundaverunt primordia, utpote Eliam ac Eliseum; deinde principes et auctores novi Testamenti, videlicet Joannem Baptistam, et Petrum ac Paulum, ceterosque ejusdem Testamenti viros, legimus cinctos fuisse. Quorum prior, puta Elias (qui in veteri Testamento præfiguravit ac prætulit virginitatis flores et continentiæ ac castitatis exempla), quum missus fuisset a Domino ad increpandos nuntios Ochoziæ sacrilegi regis Israel, eo quod infirmitate detentus destinavit ad consulendum Beelzebub deum Accaron de statu suo, propter quod Elias prædixit impium regem illum de lecto ægritudinis suæ non descensurum;23 ab eodem rege est cognitus ex descriptione sui vestitus. Reversos etenim ad se nuntios suos, et Eliæ sententiam sibi denuntiantes, interrogavit præfatus rex, cujus esset figuræ et habitus vir qui eis occurrit et se moriturum prædixit. Qui responderunt: Vir pilosus, et zona pellicea accinctus renes. Ex quo habitu rex statim considerans hominem Dei, ait, Elias Thesbites est; zonæ indicio et pilosi incultique corporis dispositione, virum Dei indubitanter agnoscens: quoniam tempore illo Elias inter tot millia Israelitici populi habitans, tali vestitu ac corporis dispositione, tanquam speciali signo assidue usus est.
Denique, de Joanne Baptista, qui novi ac veteris Testamenti quasi quidam sacratissimus terminus et finis atque initium fuit, ait Evangelista: Ipse Joannes habebat vestimentum de pilis camelorum, et zonam pelliceam circa lumbos suos.4 Petro quoque ab Herode incarcerato et die sequenti occidendo adsistens angelus, dixit: Præcingere, et calcea te caligas tuas.5 Quod angelus nequaquam admonuisset, nisi vidisset Petrum propter repausationem nocturnæ quietis fatigata membra sua laxasse, seu dissolvisse a solita cinguli circumligatione. Præterea Agabus propheta, Paulum apostolum ascendentem Jerosolymam et a Judæis paulo post vinculandum reperiens in Cæsarea, sublato cingulo Pauli, ligans ei manus ac pedes, quatenus gestu corporis sui præfiguraret injurias tribulationis ei imminentis, asseruit: Hæc dicit Spiritus Sanctus: Virum cujus est zona hæc, sic alligabunt Judæi in Jerusalem, et tradent in manus gentium. Quod a propheta Agabo nullatenus dictum fuisset, nisi Paulus zonam ad lumbos suos portare solitus exstitisset.6
Footnotes
Chapter 3 of 279