Liber XIII, Epistola 23

Ad Bonifacium Notarium Corsicae.

Joannem clericum hortetur ut Romam cognoscendus veniat.

Gregorius Bonifacio notario Corsicae.

Ea quae nobis experientia tua de Joanne, Ravennate clerico, indicavit facere, idcirco distulimus, quia de qualitate personae absentis judicare non possumus. Sed hortare eum ut ad nos venire festinet, quatenus in praesenti mores et personae ipsius qualitatem subtiliter addiscentes, quid de his quae petit fieri debeat sine dubietate aliqua disponamus.