Lettre CLXXI. À M. Pierre de Bérulle

Combien il se réjouirait de le voir venir en Savoie. - Le Saint consacré évêque ; retraite préparatoire faite sous la direction du P. Fourier. - La perfection absolue impossible en ce monde. - Divers messages.

Annecy, 18 décembre 1602.

Monsieur,

La vostre que monsieur Santeul m'apporta m'a extremement consolé par le tesmoignage qu'elle me rend de la continuation de vostre bienveuillance en mon endroit, bien que je n'en eusse aucun doute, asseuré de vostre bonté et constance. J'ay veu que vous panches encor a l'opinion que vous me communiquastes de venir quelque tems a la recollection et retraitte en ces quartiers. Dieu vous veüille dire luy mesme en vostre cœur ce quil en desire ; mais si ce bonheur m'arrivoit, je le mettrois au premier rang de ceux que j'ay eu ci devant, tout aupres de celluy que j'ay receu en vostre connoissance, car aussi en seroit ce l'accroissement et perfection. Les deux conditions que vous mettes pour l'execution de ce dessein ne me semblent revenir qu'a une seule, d'autant que si vous avés la liberté, je ne doute point que Nostre Seigneur ne vous face connoistre quil se veut servir de vous pour l'administration de son saint Evangile.

Je suis Evesque consacré des le jour Nostre Dame, 8 de ce mois, qui me fait vous conjurer de m'ayder tousjours plus chaudement par vos prieres, comme de ma part je ne vous oublie pas, sur tout en la recommandation de la Messe. J'ay eu le bien de faire un peu de recollection et exercice en l'assistence du P. Forier, l'un des excellens Jesuites que j'aye rencontré , avant mon sacre. Ce que je vous dis par ce que je vous veux rendre conte de mon esprit comme vous me faittes du vostre, disant que vous continués en une grande varieté d'occupations et multitude d'imperfections. Il ni a remede : nous aurons tous-jours besoin du lavement des piedz (Jn 13,10), puisque nous cheminons sur la poussiere. Nostre bon Dieu nous face la grace de vivre et mourir en son service.

Je vous supplie, Monsieur, de croire entierement quil ni a homme au monde qui vous soit plus dedié et affectionné que je suis et seray toute ma vie, pour demeurer,

Monsieur,

Vostre tres humble et tres affectionné serviteur,

FRANçs DE SALES,

Evesque de Geneve.

Avec vostre congé, je vous supplie de me ramentevoir aux prieres de madamoyselle vostre mere et de madame la lieutenante vostre tante . Je suis consolé que Emond soit aupres de vostre personne, asseuré quil y rendra le bon et fidelle service que je vous souhaitte.

A Neci, le 18 decembre 1602. Monsieur de Berulle.

Revu sur l'Autographe conservé à la Visitation de Paray-le-Monial.