Lettre DXV. À la Baronne de Chantal

Souhaits de bienvenue et offrande d'un gîte, - Envoi d'exemplaires de l'Introduction à la Vie devote. - Joie du Saint de voir que tous les siens parlent avec respect et affection de la petite Aimée et de sa mère, - :Mme de Chantal attendue à Sales, - De quels documents l'auteur compte se servir pour une seconde édition de l'Introduction, - L'Abbesse du Puits-d'Orbe et son frère. - Affection de François de Sales pour Marie-Aimée,

Annecy, mi.février 1609 ,

Mon Dieu, que vous seres la bien venue, ma cherc Fille, et comme il m'est advis que mon ame embrasse la vostre cherement ! Partes donq au premier beau jour que vous verrés, apres que vostre cheval se sera delassé, lequel, sans doute, on ne pourroit pas bien vous renvoyer sinon despuis troys jours en ça, pour les dernieres pluyes qui sont tombees en ce païs. Je vous souhaitte bon et heureux voyage et que ma petite fille (Marie-Aimée) ne soit pas mallement du travail du chemin ; mais arrivant de bonne heure le soir et la faisant bien dormir, j'espere qu'elle fera prou.

M. de Ballon desire tant que vous facies vostre giste chez luy, que je suis contraint aussi de le desirer pour la bonne amitié qu'il nous porte.

Madame du Puys d'Orbe m'avoit escrit qu'elle desiroit de venir avec vous ; mais ni la sayson n'est pas propre pour elle, ni je ne voudrois pas l'avoir en tems si incommode comme est le Caresme. Je luy escris donq qu'elle attende le vray primtems et qu'elle vienne en litiere, affin que si l'une de ses seurs veut l'accompaigner, elle le puisse faire sans apprehension d'aller a cheval. Je luy envoye le livre ci-joint l'autre a madamoyselle de Traves selon vostre desir. Le Pere de Monchi (note 44) m'en demandoit un : si vous luy donnés celuy que vous avés, je vous en rendray un plus brave icy ; car encor le faut-il consoler. J'en voudrois envoyer a plusieurs personnes, mais je vous asseure que, pour tout, il n'en est venu que trente en ce pais, et je n'ay peu fournir a la dixiesme partie de ceux a qui j'en devois donner. Il est vray que je n'en suis pas tant en peyne, parce que je sçai que de dela il y en a plus qu'icy. J'ay creu neanmoins que je devois en envoyer un a M. de Chantal , et qu'il s'offenceroit si je ne le faysois ; c'est pourquoy le voyla.

Qu'ay-je a vous dire de plus, ma chere Fille ? Mille choses, mais que je n'ay nulloysir d'escrire, car je veux que Claude parte sans plus tarder. Sachés seulement, ma vraye Fille, que je suis tout plein de joye et de contentement dequoy vostre Groysi parle non seulement avec respect, mais avec un amour tout affectionné de vous et de messieurs vos peres ,et ce qui me plaist le plus, de ma chere petite Aymee. Je vous dis la verité, il ne me sçauroit plus donner de playsir que par la ; et vrayement j'espere que tout ira fort bien et qu'il ne demeurera nul sujet de mescontentement a personne. Ne vous repentes point de m'avoir escrit des douze cens livres ; car vous ne vous deves nullement repentir de rien qui se passe avec moy.

Et bien, je verray donq bien des miseres, et nous en parlerons, a mon- advis, a souhait.

Ma mere desire que vous facies vostre petit delassement a Sales, ou elle vous attendra pour vous accompaigner icy ; mais ne croyes pas que je vous y laisse sans moy. Non pas, certes, car ou je vous y attendray, ou j'y seray aussi tost que je vous y sçauray ,

Je n'escris point a vostre commere , car j'auray loysir de l'entretenir bien au long. Et si, je confesse que vous m'aves fait bien playsir de la mettre sur vostre train, bien que pour elle il faudra peut estre que je me mette en despense, affin qu'a son retour, elle face bon recit de ma magnificence. Voyes vous, je ris des-ja dans le cœur sur l'attente de vostte arrivee .

Apportes moy toutes les lettres et memoyres que je vous ay jamais envoyé, si vous les aves encor (ce que je dis a cause du naufrage que vous fistes a vandanges, par ce que sil faut reimprimer l'Introduction, cela me deschargera beaucoup, y treuvant plusieurs choses pour ce sujet ; puisque l'on ne m'a encor corrigé pour la substance de ce livre-la que de m'estre trop peu estendu.

La bonne Mme de Charmoysi fait prou ; vous la treuverés bien avancee aux affections et aux effectz de la vraye devotion. Mais mon Dieu, la voyla l'un des pieds sur le süeil de la porte de la cour. J'espere que Dieu la tiendra par tout de sa main ; au moins il luy donne des bonnes resolutions. Je sçai que vostre venue luy sera ……………………………………………..

Je vous prie de bien faire tenir a la bonne Mme du Puys d'Orbe le pacquet ci joint, car il faut luy donner satisfaction a la pauvrette. J'ayme bien son cœur par ce quil m'est bien franc. Elle m'escrit que, pour tous les advis que je luy ay donnés pour le bon ordre de son Monastere, elle ne pourroit pas se resoudre a rien faire sans le consentement de son frere , qui a, dit elle, un grand pouvoir sur sa volonté.. Elle m'a infiniment obligé a me parler ainsy clair.

J'ay ouvert la lettre que mon frere (Sans doute Bernard.) vous escrivoit, pour curiosité que j'avois de voir le poulet qui estoit dedans. Je n'escris point a la chere petite (Marie-Aimée), mais je sçai bien que je luy garde le plus amoureux salut que j'aye fait a damoyselle du monde il y a seze ans.

Mon Dieu, ma Fille, que j'ay grand desir que le bon et doux Jesus vive et regne dans nos cœurs ! C'est en luy que je suis tout uniquement vostre.