Lettre DXX. À la Présidente Brulart

Trop différer la première Communion : grande erreur. - le visage pâle et l'âme vermeille. - Envoi d'un exemplaire corrigé de l'Introduction.

Annecy, fin mars ou commencement d'avril 1609 ;

N'attendes pas de moy maintenant que je vous escrive a souhait, car bien que ce soit par mon frere , si n'ay-je pas beaucoup de loysir et si je ne sçai s'il passera a Dijon ; mais je sçai bien pourtant qu'il fera rendre seurement ma lettre. .

Ouy, ma Fille, sans doute, il ne faut pas laisser passer ces Pasques sans faire communier vostre filz. Mon Dieu, c'est un docteur des-ja ! C'est un grand erreur, ce me semble, de tant differer ce bien en cet aage, auquel les enfans ont plus de discours a dix ans que nous n'en avions a quinze. Vrayement, j'eusse bien desiré de luy donner la premiere Communion : ce luy eust esté un sujet de se resouvenir de moy et de.m'aymer toute sa vie. Mais bien, il n'importe pas pour luy.

J'ay receu l'image de la bienheureuse Mere Therese, dont je suis consolé et vous en remercie.

Je suis bien ayse de sçavoir que cette fille soit en paix avec monsieur Chevrier . Vrayement, je luy escrivis par M. de Moyron, qu'elle fist ce qu'elle a fait de point en point, sur une lettre par laquelle elle me demandoit conseil.

Eh bien, ma chere Fille, Dieu soit loué : pourveu que nostre ame soit coloree du vermeil de la charité; .il ne nous doit pas chaloir que nous ayons les pasles couleurs. C'est un mal propre a mortifier et les sens et les sentimens, car il ne laisse point de mouvement qu'il n'allanguisse, horsmis celuy du cœur, lequel, pour l'ordinaire, il esmeut et rend plus frequent. Rendés-le bien utile a vostre advancement spirituel par vostre abnegation reelle des goustz, des suavités qu'il vous oste, non seulement quant au cors, mais encor quant a l'esprit. Vous faites bien de prattiquer mes advis, car ilz sont selon la volonté de Dieu ; et si cette maladie vous y donne plus de repugnance, tant plus gaigneres vous en leur exercice.

Je pensois vous envoyer plusieurs livres (de I'lntroduction à la Vie devote.), mais l'imprimeur m'a manqué de parole de les m'envoyer ; je crains que vous en aurés la plus tost que moy icy. Je vous envoye neanmoins celuy-ci, que j'ay emprunté d'une dame qui l'avoit, affin que, s'il est possible, vous ayes le premier de ma part. Il faudra corriger les autres sur iceluy, car je l'ay corrigé par tout, tant que j'ay peu.

Dieu soit a jamais nostre amour, ma chere Fille, et croyés que je suis en luy tout particulierement, vostre.

F.

Vive Jesus!

Ne dites pas que je vous ay envoyé ce livre, jusques a ce que je puisse en envoyer davantage.