Lettre DCXVIII. À la Même

La méthode de Mme de Chantal. - La confession de Françon. - Doux pressentiments intimes à l'approche de la fête de la Nativité de la très sainte Vierge. - La céleste Pouponne.

Annecy, 7 septembre 1610 .

Je treuve certes encor meilleur (sic) la methode que vous dites, d'escrire au P. de Monchi tout nüement vostre pensee, ma tres chere Fille, car apres cela il ny aura rien a dire. Ce bon Frere qui est icy , ne partira que jeudi (Le 9 septembre), car tout aujourdhuy j'ay esté tant tracassé quil n'est pas possible de plus.

Ne jeusnes pas , ma tres chere Fille, ni nostre fille de Brechard (lettre 612) ; car, quant a vous, je me souviendray bien, apres que vous seres bravement guerie, de vous faire jeusner un samedi en eschange.

Envoyes moy nostre Françon , que nous confesserons ce soir. Parles amiablement, mais gravement, au bon enfant M. de Grenier, lequel j'espere fera quelque chose de bon .

Nostre cher neveu a certain desir de ne retourner pas vers le pere , mais je n'y vois point d'apparence. Il faut bien tout cet hiver pour la digestion de nostre resolution .

Au demeurant, je me suis treuvé ce matin, avec une certaine douceur et tranquillité d'esprit, sans aucun ressentiment de l'estonnement que mon cœur avoit eü, que j'ay conneu clairement que la venue de Nostre Dame s'approchoit, par un presentiment de sa douce lumiere. J'y envie de vous parler un peu bien a loysir de cela.

Cependant, bon soir, ma tres chere Fille, ma Seur ; faites bien la cour a cette celeste Pouponne qui nous arrive, et luy demandes sa grace pour impetrer celle de son Filz. Jamais je n'eu tant de sainte affection que j'en ay pour nostre ame et nostre tres unique cœur.

A Madame

Madame de Chantal,

ma tres chere Fille.

Revu sur l'Autographe conservé à la Visitation de Metz.