Lettre DCXIX. À Madame de Travernay

Une âme docile. - L'exercice de l'amour sacré et les tribulations. Un. spectacle encourageant.

Annecy, 11 septembre 1610.

Madame,

Mais moy, j'ay bien de la consolation de vous voir recevoir si doucement les essais que je fay au service de vostre chere ame, laquelle voyant marquee de plusieurs graces celestes, je ne puis que je n'ayme tendrement et puissamment. C'est pourquoy je luy souhaitte de plus en plus beaucoup d'avancement au saint amour de Dieu, qui est la benediction des benedictions.

Or, vous sçavés, ma tres chere Fille, que le feu que Moyse vit sur la montaigne (Ex 3,1) representoit ce saint amour, et que, comme ces flammes se nourrissoyent entre les espines, aussi l'exercice de l'amour sacré se maintient bien plus heureusement parmi les tribulations qu'emmi les contentemens. Vous aves donq bien occasion de connoistre que Nostre Seigneur desire que vous proffities en sa dilection, puisqu'il vous donne une santé presque tousjours incertaine et plusieurs autres exercices.

Mon Dieu, ma tres chere Fille, que c'est chose douce de voir Nostre Seigneur couronné d'espines sur la croix et de gloire au Ciel ! car cela nous encourage a recevoir les contradictions amoureusement, sçachans bien que, par la couronne d'espines, nous arriverons a la couronne de felicité. Tenés vous tous-jours bien serree et jointe a Nostre Seigneur, et vous ne sçauries avoir aucun mal qui ne se convertisse en bien.

Madame,

Vostre humble et tres affectionné serviteur et compere,

FRANçs, E. de Geneve.

Le 11 septembre 1610