Lettre MDLVIII. À la Mère de Chantal, a Paris

(INÉDITE)

L'hôte de l'Evêque de Genève à Bourges. - Lettres du Saint et de la Sainte trop lentes à parvenir. - Début des tracasseries au sujet du mariage de M. de Foras. - La courte consolation des Sœurs de Moulins. - Pourquoi François de Sales n'écrit pas longuement.

Bourges, 28 ou 29 septembre lôl9 .

Ma tres chere Mere,

Icy a Bourges, entre les caresses non pareilles de nostre Monseigneur l'Archevesque en sa mayson, j'ay receu vostre lettre du 23 de ce moys, unique, jusques a present, que j'aye receüe. Mais j'admire bien plus que vous ayant escrit de Chatres (sic), d'Orleans, de Tours, d'Amboyse, vous n'en ayes encor receu pas un seul mot. Au moins suis-je asseuré que M. Flocard vous aura veu, et fidelement mis en main ma lettre ( lettre 1552 ) a l'heure que j'escris celleci, si quelque disgrace ne luy est survenue.

Or sus, il faut que M. et Mlle de Forax digere (sic) ces amertumes, puisque Dieu le permet, qui, comme j'espere, leur donnera ensuite des bonnes et solides consolations. Ell'a eu rayson de dire que c'estoit elle qui avoit fait le mariage, car je ny ay, pour moy, contribué que ce que je ne pouvois pas refuser a la verité des qualités de M. de Forax et que je ne devois pas denier a son amitié .

Nos Seurs ont esté consolees plus quil ne se peut dire, bien qu'en cet embaras incroyable je ne les ay guiere veu en particulier, ains seulement a la Messe et exhortation . De leurs nouvelles, je vous en escriray par chemin entre ci et Moulins, comme des nouvelles de celles de Moulins entre Moulins et Lyon ; car en ces villes ou on fait les complimens a Madame , il ny a nul moyen d'escrire qu'aux heures esquelles vous ne voules pas que j'escrive.

C'est pourquoy, bon soir, ma tres chere Mere ; Dieu soit a jamais au milieu de nostre unique cœur. Amen.

Je salue de toute mon affection nos cheres Seurs. Amen.

Ma tres chere Mere, je partz ainsy, sans loysir d'escrire davantage ; mais salues, je vous supplie, nos bonnes dames. Nostre Seigneur soit nostre tres unique praetention. Amen.

A Madame

[Mad]ame de Chantal,

Sup re de Ste Marie de la Visitation.

Paris.

Revu sur l'Autographe conservé à la Visitation de Limoges.