Lettre MDLV. À Madame Angélique Arnauld, Abbesse de Port-Royal a Maubuisson

Intime union que l'éloignement resserre de plus en plus. - Un père chrétiennement résigné. - Attendrissement du Saint sur la maladie de deux de ses filles spirituelles ; prière qu'il adresse à Dieu.

Amboise, 22 septembre 1619.

A mesure que je m'esloigne de vous, ma tres chere Fille, selon les lieux, je me sens interieurement de plus en plus joint et uni a vostre cœur selon l'esprit; et connois bien par la que c'est le bon playsir de Dieu que nous ayons ce sentiment de veritable et sincere dilection.

J'ay veu en fin monsieur vostre frere , que je proteste d'estre l'un des aymables personnages que j'aye veu jamais, pour la bonté et pieté de cœur que Dieu luy a donnee. Le jour precedent il avoit eu l'advis du depart de son pauvre petit François , et neanmoins son esprit estoit en une tranquillité parfaite, et avec un certain repos en la volonté de Dieu, qu'autre que Dieu mesme ne pouvoit luy avoir donné.

J'avois escrit jusques icy, ma tres chere Fille, quand j'ay esté emporté du tracas a la cour, et apres disné ay reveu ce cher frere, tous-jours plus ferme de courage, quoy qu'attendri jusques aux yeux sur la maladie de nos Seurs Catherine de Gennes et Marie . O ma Fille, Dieu me soit en ayde. A peu que je ne luy aye dit les paroles de cet ancien Prophete ( 3 R 17,20 ) : Et comment, Seigneur, vous affliges donq encor ces filles, qui pour l'amour de vous m'ont repeu et nourri ? Mays non, ma Fille toute tres chere, j'ayme mieux, avec l'autre Prophete ( Ps 38,10 ) dire : Je suis muet sous vos verges, et n'ouvre nullement ma bouche, car c'est vous qui faites cela. En somme, il sera tous-jours vray que ceux qui pretendent d'avoir part avec Jesus glorifié doivent premierement avoir part avec Jesus crucifié ( Rm 8,17 ).

Or sus, ma Fille, tenes vostre courage haut eslevé en Dieu, en sa providence, en l'eternité. Amen.

Je suis ce que ce mesme Dieu veut et sçait que je suis pour vous, et je ne le sçaurois mieux dire qu'ainsy. Je vous escriray a toutes rencontres, estimant qu'en contentant mon ame en cela, je feray selon le gré de la vostre, que je prie Nostre Seigneur de rendre toute sainte.

Amen.

FRANçs, E. de Geneve.

Le 22 septembre 1619.