Lettre MDLVI. À Madame le Maistre

Les faveurs de l'Epoux divin. - Eloge de Robert Arnauld. - Le martyre de saint Maurice ; le martyre du cœur. – " Tintamarres et presse " qui empêchent le Saint d'écrire à son gré.

Amboise, 22 septembre 1619.

Que vous diray-je, ma Fille, vous voyant parmi ces amertumes ? Oh ! courage, je vous prie ; l'Espoux que vous aves choisi des que vous estes separee de celuy qu'on vous avoit choysi , est un faisceau de myrrhe

( Ct 1,12 ) : quicomque l'ayme ne peut n'aymer pas l'amertume ; et ceux qu'il favorise de son plus estroit amour sont tous-jours piqués de tribulations. Comme pourroit on serrer sur sa poitrine Nostre Seigneur crucifié, sans que les cloux et les espines qui le transpercent ne nous percent ?

O le brave et bon frere que vous aves icy ! Helas ! le depart de son pauvre petit François ne l'a touché que comme un pere qui voit partir son filz de sa mayson et s'esloigner de luy pour approcher un grand Roy et aller recevoir ses faveurs. Voyla, certes, comme il faut vivre en cette vie si pleyne d'inconstance et d'evenemens divers. Mais quand ce frere a sceu vostre maladie et celle de nostre Seur Marie, son cœur s'est attendri et son sentiment a paru sur les yeux; et toutefois il demeure ferme et sans trouble, tant il est vertueux et vertueusement chrestien.

Et moy, ma tres chere Fille, j'espere que Dieu ayant receu en sacrifice de suavité l'acquiescement de ce pere et le vostre, et celuy du grand pere et de la grand mere, et des tantes , il ne permettra pas que la tribulation face plus de progres : ainsy je l'en supplie, et qu'il vous face sainte.

Le grand saint Maurice, patron de la Touraine, dont on fait aujourd'huy la feste, vit tuer toute sa chere legion devant ses yeux; et on peut dire qu'il souffrit autant de fois le martyre comme il vit martyriser et meurtrir de soldatz. Ma Fille, nous souffrons le martyre du cœur quand, pour l'amour de Dieu, nous voyons mourir et acquiesçons a la mort de ceux que nous cherissons. Or sus, que puis je dire davantage ? Celle qui vit mourir le plus aymable filz de tous les filz sur la croix, veuille impetrer de ce mesme Filz les consolations qui vous seront convenables, et a monsieur vostre pere et a madamoyselle vostre mere.

Je porte au milieu de .mon cœur la memoire de madamoyselle N., vostre chere cousine et ma chere fille , et voudrois bien luy escrire ; mays je ne puis parmi ces tintamarres de cette presse qui a peine m'a peu permettre de vous escrire ces lignes. Salues la cherement de ma part, je vous supplie, et l'asseures que je ne passeray pas Bourges, ou nous nous acheminons demain matin , sans que je luy envoye une de mes lettres. Aymes cette chere ame, et l'appuyes de vostre conversation, affin que, selon ses inclinations bonnes et vertueuses, elle serve Dieu de mieux en mieux.

Je n'escris point non plus a madamoyselle vostre mere, car je sçai bien qu'elle se contente que ce soit a

vous a qui je dis que je suis finalement son serviteur tres humble. Ma tres chere Fille, demeures ferme et forte en l'amour de Nostre Seigneur, qui m'a rendu, sans que jamais je varie, parfaitement tout vostre.

FRANçs, E. de Geneve.

D'Amboyse, ce 22 septembre 1619.