Lettre MDXLV. À une Dame

La courte durée des séparations faites par la mort. - Contemplation de Jésus et de Marie sur le Calvaire. - Une mère dépouillée de son plus précieux vêtement . .

Paris, 23 août 1619.

Ayant sceu vostre affliction, ma tres chere Fille, mon ame en a esté touchee de la mesure de l'amour cordial que Dieu m'a donné pour vous ; car je vous voy, ce me semble, grandement assaillie de desplaysir, comme une mere qui est separee de son filz unique, et certes bien aymable. Je ne doute pas pourtant que vous ne pensies bien et soyes tres asseuree que cette separation ne soit pas de longue duree, puisque tous nous allons a grans pas ou ce filz se retreuve : entre les bras, comme nous. devons esperer, de la misericorde de Dieu. C'est pourquoy vous deves mitiger et adoucir tant qu'il Vous sera possible, par la rayson, la douleur que la nature vous donne.

Mays je vous parle trop reservement, ma tres chere Fille. Il y a si long tems que vous aves desiré de servir Dieu et que vous estes apprise a l'eschole de la croix, que non seulement vous acceptes celle ci patiemment, mais, je m'asseure, doucement et amoureusement, en consideration de Celuy qui porta la sienne et fut porté sur la sienne jusques a la mort, et de Celle qui n'ayant qu'un filz, mais filz d'amour incomparable, le vit mourir sur la croix, avec des yeux pleins de larmes et un cœur plein de douleur, mais de douleur douce et suave, en faveur de vostre salut et de celuy de tout le monde.

En fin, ma tres chere Fille, vous voyla despouillee et desnuee du vestement le plus pretieux que vous eussies. Benisses le nom de Dieu qui vous l'avoit donné, et l'a repris ( Jb 1,21 ), et sa divine Majesté. vous tiendra lieu d'enfant. Pour moy, j'ay des-ja prié Dieu pour ce defunt, et continueray selon le grand devoir que j'ay a vostre ame, laquelle je prie la bonté eternelle de Nostre Seigneur vouloir remplir de benedictions ; et suis sans reserve tout vostre, ma tres chere Fille, et

Vostre serviteur plus humble,

FRANçs, E. de Geneve.

Le 23 aoust 1619.