Lettre CMXLIX. À Madame d'Escrilles

Quand faut-il s'abandonner entièrement entre les bras de la Providence. Comment parler des personnes qui nous ont fait tort. - Ce qui est plus efficace contre le mal que le ressentiment.

Annecy, 7 janvier 1614.

Ma Seur tres chere et tous-jours de plus en plus tres chere Seur,

Je viens tout maintenant de recevoir les deux lettres que vous avies confiees a Mme de Trevernay , et une autre par laquelle elle me specifie la qualité de vostre desplaysir, que je vois estre grandement fascheux pour la multitude des accidens qui semblent attachés aux sujetz dont il vous est arrivé.

Ma tres chere Seur, ces brouillardz ne sont pas si espais que le soleil ne les dissipe. En fin, Dieu qui vous a conduite jusques a present, vous tiendra de sa tres sainte main ( Ps 138,10 ); mais il faut que vous vous jetties, avec un total abandonnement de vous mesme, entre les bras de sa providence, car c'est le tems desirable ( 2 Co 6,2 ) pour cela.

Se confier en Dieu emmi la douceur et la paix des prosperités, chacun presque le sçait faire; mais de se remettre a luy entre les orages et tempestes, c'est le propre de ses enfans ; je dis, se remettre a luy avec un entier abandonnement. Si vous le faites, croyes moy, ma chere Seur, vous seres toute estonnee de merveille, qu'un jour vous verres esvanouis devant vos yeux tous ces espouvantailz qui maintenant vous troublent. Sa divine Majesté attend cela de vous, puisqu'elle vous a tiree a soy pour vous rendre extraordinairement sienne.

De cet homme sur lequel vous penses devoir estre jettee une partie de la faute, parlés en peu et consciencieusement ; c'est a dire, ne vous estendes gueres en vos plaintes et n'en faites pas souvent; et quand vous en feres, n'asseures rien qu'a mesure que vous aures de la connoissance ou conjectures de la faute, parlant douteusement des choses douteuses, plus ou moins, selon qu'elles le seront.

Je vous escris du tout sans loysir, en un jour le plus embarrassé que j'aye eü il y a long tems. Je suppleeray de plus en plus, s'il plaist a Dieu, priant pour vostre repos et consolation. Apaises tant que vous pourres, doucement et sagement, les espritz de messieurs vos parens. Helas ! en telles occasions, la dissimulation guerit plus de mal en une heure que les ressentimens en un an. Dieu doit faire le tout ; c'est pourquoy il l'en faut supplier.

Dieu soit a jamais au milieu de vostre cœur, ma tres chere Seur, ma Fille. Je suis tres parfaitement,

Vostre plus humble frere et serviteur,

FRANçs, E. de Geneve.

Le 7 janvier 1614.