Lettre CMLVIII. À Madame de la Valbonne

Il ne faut jamais cesser de coopérer de son mieux au salut du prochain. Comment aborder une âme pécheresse et avec quel sentiment. - Le moindre brin du divin amour, préférable à tous les trésors du monde.

Annecy, 5 février 1614 .

Je vous escris subitement, ma tres chere Niece, sur le sujet que vous me touchastes dernierement, parce que n'ayant pas eu de porteur d'asseurance, je n'avois pas voulu vous faire responce a ce point la.

Cette pauvre miserable Bellot a une ame qui ne veut point estre corrigee par censures, car elles ne luy ont pas manqué au commencement de ses vanités, cause de sa ruine ; et la bonne Mere de Chantal n'a rien espargné de ce qu'elle pouvait penser estre propre pour l'en retirer , prevoyant bien que cette humeur vaine la porteroit plus loin que pour lhors elle ne s'imaginait.

Neanmoins, on ne sçait pas les conseilz de Dieu, et ne faut jamais cesser de cooperer au salut du prochain en la meilleure façon que l'on peut. Si donques vous pouvies parler a cette chetifve creature, la prenant un peu doucement et amoureusement, luy remonstrant combien elle seroit heureuse de vivre en la grace de Dieu, l'enquerant si, quand elle [y] a vescu lhors qu'elle vint en cette ville, elle n'estait pas plus ayse que maintenant, et passant ainsy tout bellement a luy representer son malheur, je pense que cela la pourroit toucher. Mais il faut tesmoigner que vous estes portee d'amour envers elle, et que vous n'aves point eü horreur de son malheur. Or, quand vous ne feries que luy faire faire un bon souspir, Dieu en sera glorifié. Mais je croy bien que vous aures de la peyne a treuver la commodité de faire a propos cet office qui requiert beaucoup de loysir ; car on nous dit qu'elle est gardee fort soigneusement. 0 que de misericordes Dieu fait aux ames qu'il retient en sa tres sainte crainte et en son divin amour ! Mieux vaut le moindre brin de ce tresor, que tout ce qui est au monde.

Vives tous-jours toute a ce souverain Bien, ma tres chere Fille; c'est la priere ordinaire de

Vostre tres humble oncle et serviteur,

FRANçs, E. de Geneve.

Le jour de sainte Agathe.