Lettre CMLI. À Monseigneur Pierre Fenouillet Évêque de Montpellier

Salutations affectueuses envoyées au destinataire de passage à Lyon. - Le Saint s'excuse de ne pouvoir accepter l'invitation de prêcher à Toulouse.

Annecy, 10 janvier 1614.

Monseigneur,

Je vous vay rencontrer en esprit au passage que vous deves faire a Lion ; et ces quatre paroles vous asseureront, sil vous plait, que sil m'estoit aussi aysé de me porter moy mesme sur le lieu en effect, comm'ill'est a ce porteur, vous me verries, plein de joye et d'amour, le plus empressé de tous autour de vous. Il ny a remede, il faut accommoder nos souhaitz a nos necessités, d'ou qu'elles viennent.

J'ay toute ma vie grandement prisé la ville de Thoulouse, non pour sa grandeur et noblesse, mays, comme dit saint Chrisostome de son Constantinople ( Serm. Post exil. Migne Patr. Graec.52, col. 444 ), a cause du service de Dieu qui y est si constamment et religieusement maintenu. Et pensés, Monseigneur, de quel cœur je voudrois les servir ; mays vous sçaves mes liens, que rien jusques a present n'a peu rompre . Sil vous plait donques respondre a la demande que vous ont faite de moy ces seigneurs de cette ville la, je vous supplie tres humblement de leur faire sçavoir que ce n'est ni faute d'estime que je face de leurs merites, ausquelz je ne sçaurois jamais correspondre, ni faute de pouvoir que vous ayes sur moy, qui suis tres entierement vostre, mays faute de pouvoir que j'aye moy mesme sur moy mesme, que je ne seconde pas leurs desirs, plus honnorables cent fois pour moy que je ne devrois praetendre.

Au demeurant, Monseigneur, quand vous seres avec le grand et parfait ami ( Antoine des Hayes) , resouvenes vous parfois de moy, car ce m'est un playsir incomparable de m'imaginer que ne pouvant jouir du bonheur de vostre presence, je ne laisse pas de vivre en vostre bienveuillance de tous deux.

J'escris sans loysir, mays plein de l'invariable affection que j'ay d'estre sans fin,

Monseigneur,

Vostre tres humble, tres obeissant frere et serviteur,

FRANçs, E. de Geneve.

X janvier 1614.

Je fis response a Monseigneur de Dol des le moys passé.

A Monseigneur

Monseigneur le Rme Evesque de Montpelier.

Revu sur une copie de l'Autographe, conservée à la Visitation d'Annecy.