Lettre MCCCL. À Madame de Montfort

Nouveau deuil et nouvelle douleur. - Saintes dispositions de la baronne de Thorens à son lit de mort .

Annecy, 10 septembre 1617.

Madame ma tres chere Cousine,

Nous n'avions encor achevé nos plaintes pour la perte que nous avions faite en Piemont , que voyci la seconde arrivee, laquelle, je vous asseure, nous est infiniment

sensible, cette chere ame ayant tellement vescu parmi nous, qu'elle nous avoit rendus tous parfaitement siens, mais moy plus particulierement, qu'elle regardoit avec un amour et honneur filial ; et puis, le contrecoup receu par l'affliction de sa digne mere donne surcroist a nostre desplaysir.

Mais pourtant, a l'imitation de cette defunte, nous embrassons, aymons et adorons la volonté de Dieu, avec toute sousmission de tout nostre cœur, car c'estoyent presque ses dernieres paroles ; vous asseurant que jamais je n'ay veu un trespas si saint que celuy de cette fille, quoy qu'elle n'eust que cinq heures pour le faire .

Je vous remercie cependant humblement, et M. de Montfort, mon cousin , de l'honneur de vostre souvenance, et suis a jamais,

Madame ma Cousine,

Vostre tres humble cousin et serviteur,

FRANÇs, E. de Geneve.

Le 10 septembre 1617.