Lettre MDCCCXV. À Madame de Villeneuve

Peine de la destinataire sur le prochain départ de la Mère de Chantal.- Paris et les montagnes de Savoie. - Regard vers l'éternité. - Un désir de la Sœur Hélène-Angélique Lhuillier et une promesse du Fondateur. Le Saint-Esprit, lien des âmes.

Annecy, 2 août 1621.

Certes, vous estes grandement ma tres chere fille ; or, penses donq si mon cœur n'est pas touché de tendreté sur l'apprehension que vous me tesmoignes par vostre derniere, du retour de nostre tres chere Mere de Sainte Marie en ce païs . Oh ! si Dieu avoit disposé que nous fussions tous-jours ensemble, que ce seroit une chose suave ! Mais quel moyen, ma tres chere Fille ? Nos montagnes gasteroyent Paris et empescheroyent le cours de la Seine si elles y estoyent, et Paris affameroit nos vallees s'il estoit parmi ces montagnes. Un jour, ou plustost en la tressainte eternité a laquelle nous aspirons, nous serons tousjours presens les uns aux autres, si nous vivons en ce passage selon la volonté de Dieu.

Je le croy bien, ma tres chere Fille, que nostre chere Seur Helene Angelique, nostre chere fondatrice, voudroit ou retenir la sa chere Mere, ou venir icy avec elle. O que si cela estoit convenable. que volontier je desirerois de la voir un peu en ces desers ! Mays il ne faut pas seulement y penser. Une chose vous puis je dire: que cette tant chere Mere differera sa venue jusques a l'extremité, quoy qu'elle soit grandement desiree et requise icy ; mays nous nous promettons aussi que le tems estant venu, vous recevres doucement la separation de cette ame, laquelle ne sera pas une mort comme l'est la separation que l'ame fait de son cors, car le Saint Esprit, qui est la vie de nos cœurs, vous animera tous-jours de son saint amour, et vous tiendra de plus en plus unie a nous et nous a vous.

Salues, je vous supplie, cherement le cœur de la tres aymee Seur Helene Angelique, qui est bien heureuse de s'estre quittee d'elle mesme pour estre tout a fait a Dieu, qui la benisse et vous aussi, Madame ma tres chere Fille.

2 aoust 1621

Revu sur le texte inséré dans l'Histoire de la Fondation du 1er Monastère de Paris, par la Mère de Chaugy, conservée à la Visitation d'Annecy.