Lettre MDCCCXXIX. À Madame de Villeneuve

Un amour qui vient du "Maistre et Createur de l'amour. " - Douces plaintes " apprestees au verjus. " - Pourquoi Mme Flocard mérite d'être aimée.

Annecy, 20 septembre 1621.

Our certes, il est vray, ma tres chere Fille, j'ay tort, mais je dis tres grand tort, si je ne vous cheris d'une dilection toute particuliere. Vostre cœur, qui en a une singuliere pour le mien, merite, pour le moins, bien ce reciproque. Mays avec cela, ma tres chere Fille, le Maistre et le Createur de l'amour a fait celuy qu'il m'a donné pour vous d'une façon que, le recevant, je le doy employer de toutes mes forces. Aussi fay-je certes, ma tres chere Fille; luy mesme, l'autheur, le sçait et le void bien, et je ne doute point qu'il n'en asseure vostre esprit.

Non, non, ma Fille, n'ayes pas crainte de me surprendre, j'entens tres bien vostre langage : vos plaintes ne sont pas aigres, ce sont des douceurs d'un enfant envers son pere ; si elles sont apprestees au verjus, ce n'est que pour leur donner le haut goust. Faites en seulement souvent de ces plaintes, ma tres chere Fille, affin qu'autant de foys que vous feres semblant de ne croire pas que vous estes ma tres particulierement tres chere fille, je proteste de mon costé que vous l'estes et le seres a jamais invariablement; car j'ay un extreme playsir a repeter cette verité.

O que nostre tres chere Seur Helene Angelique est bienheureuse d'estre en cette vocation avec le bon playsir de Dieu, qui luy donne la clarté et la consolation convenable et propre a graver profondement son tressaint et pur amour en son cœur.

M. Flocard qui vouloit revenir icy a cause de sa femme, avoit rayson, car sa femme est digne d'estre aymee, puisqu'elle tasche de tout son cœur de bien aymer Dieu ; et ayant sceu l'honneur que vous faites a son mari ……………….tous-jours privee de la presence de son mari qui est en Piemont des il y [a] 11 moys .

Or sus, ma tres chere Fille, je suis invariablement et tres singulierement

Vostre tres humble et tres fidele serviteur.

Et vous estes ma tres chere fille en Celuy qui est nostre Tout, qui est beni es siecles des siecles.

20 septembre 1621, Annessi.

Revu sur l'Autographe appartenant à Mme Thinault, à Poitiers.