Lettre MDCCCIX. Au Duc de Nemours, Henri de Savoie

Témoignage rendu au zèle et au talent de M. de la Pesse. - Un moyen, pour le prince, de montrer son contentement à ses serviteurs et de tenir en ordre ses affaires.

Annecy, 25 juillet 1621.

Monseigneur,

J'attens de jour a autre le despart de monsieur de Varenne pour vous envoyer le certificat de l'execution fidele du vœu que Vostre Grandeur m'avoit confié pour Nostre Dame de Laurette . Mays ce pendant, monsieur de la Pesse m'ayant communiqué la prœtention qu'il a de perseverer au service qu'il a exercé ci devant en vostre Conseil de ce pays, je me sens obligé de recommander a Vostre Grandeur sa tres humble supplication, non seulement par ce qu'il est fort homme de bien, mais par ce qu'il s'est tres affectionnement employé en sa charge en un tems difficile et pour des occasions esquelles on ne pouvait pas nier qu'il ne fallut qu'il eüt du zele et du courage ; et peut on dire que sans la fermeté et la diligence de monsieur le collateral Floccard son beaufrere , et la sienne, le sieur Bonfilz, qui avoit une grande industrie et un grand support, ne fut jamais venu au compte auquel l'authorité de Son Altesse l'a reduit . Et par ce, Monseigneur, que je suys tesmoin d'une partie du soin que ledit sieur Floccard et le sieur de la Pesse ont eü pour cela, je ne fay nulle difficulté d'interceder maintenant en ce sujet, auquel il me semble que Vostre Grandeur doit tesmoigner le gré qu'elle sçait a ses serviteurs quand ilz luy ont rendu des bons services ; laissant a part que la tranquillité et l'asseurance des serviteurs anime et tient en ordre les affaires, comme les mouvemens ont accoustumé de les embarasser.

Et je supplie tres humblement Vostre Grandeur de croire que je luy propose mes sentimens avec fidelité et sincerité, n'ayant aucun interest en toute cett' affaire que celuy de son service et du repos de ceux qui y sont et s'y employe (sic) utilement. Je me promez de Vostre Grandeur cette creance, selon vostre bonté,

Monseigneur, qui suys invariablement

Vostre tres humble et tres obeissant orateur et serviteur,

FRANçs, E. de Geneve.

xxv julliet 1621, Annessi.

Revu sur l'Autographe conservé à la Visitation de Brioude.