Lettre MDCCCXVII. À la Mère de la Martinière Supérieure de la Visitation de Valence

Dieu, qui donne les charges, donne en même temps son secours pour les remplir. - Humilité et vaillance. - L'importance du gouvernement d'un Monastère.

Annecy, 4 août 1621.

Je vous connois asses, ma tres chere Seur, ma Fille, pour vous cherir de tout mon cœur en la dilection de Nostre Seigneur, qui, ayant disposé de vous pour la charge en laquelle vous estes, s'est par consequent obligé soy mesme a soy mesme de vous prester sa tressainte main en toutes les occasions de vostre office, pourveu que vous correspondies de vostre part par une sainte et tres humble, mais tres courageuse confiance en sa bonté. Dieu appelle a son service les choses qui ne sont point (1 Co 1,28) comme les choses qui sont, et se sert du rien comme du beaucoup pour la gloire de son nom.

Demeures en vostre propre abjection comme dans la chaire de vostre superiorité, et soyes vaillamment humble et humblement vaillante en Celuy qui fit le grand coup de sa puissance en l'humilité de sa Croix.

Une fille ou femme qui est appellee au gouvernement d'un Monastere est appellee a une grande besoigne et de grande importance, sur tout quand c'est pour fonder et establir ; mais Dieu estend son bras tout puissant a mesure de l'œuvre qu'il donne. Tenes vos yeux en ce grand Sauveur, et il vous delivrera de la pusillanimité et de l'orage ( Ps 54,9 ).

Ces Seurs qui sont avec vous sont bien heureuses de servir la, par leur bon exemple et humble observance, de fondement a cet edifice spirituel . Je suis a jamais

Vostre tres humble et tres affectionné serviteur en Nostre Seigneur,

FRANçs, E. de Geneve.

Le 4 aoust 1621.