Lettre MDCCCXXXVII. À Don Juste Guérin, Barnabite

Cordiale jalousie et défi d'amitié. - La Cour céleste et la cour terrestre à une cérémonie de prise d'habit. - Princesses pleines d'humilité " en leur serenissime altesse et grandeur. "

Annecy, 12 octobre 1621 .

O mon tres cher Pere,

Que mes yeux portent d'envie a ceux de N. et de ce garçon mon neveu , car ilz vous verront. Mais je ne porte point d'envie au cœur de qui que ce soit, car jamais il n'y en aura qui vous ayme et cherisse plus que le mien fait, et si je ne craignois d'offencer celuy de ma tres chere fille (dites moy son nom moderne , je dirois absolument : ni tant que le mien fait et fera a jamais.

Or sus, que fait elle, cette chere fille ? .M. N. et M. N. me firent un grand cas de quoy toute la cour de Madame, des serenissimes Princes et Princesses, furent a sa reception au novitiat ; et moy, je me res-jouys en la creance que j'ay dequoy Nostre Dame, les Anges et les Saintz de Paradis y furent et l'honnorerent de leur attention, et Dieu nostre Seigneur de sa benediction.

Nous sommes apres a faire les formalites pour le prieure . O mon Dieu, que le monde est fascheux en ces saintes occasions !

Mais dites moy, je vous prie, mon tres cher Pere, puis je loysiblement oser vous supplier de faire tres humblement la reverence de ma part a nos Serenissimes Dames Infantes, ou du moins a la Serenissime Princesse Catherine ? car, mon Pere, si cela est bonnement permis a mon indignité, faites le, je vous en prie de tout mon cœur, et dites leur que je les revere infiniment a cause de leur altesse, que je regarde avec toute extreme sousmission ; mais que je les revere tres infiniment a rayson de la profonde humilité qu'elles prattiquent en leur serenissime altesse et grandeur. Au moins, mon Reverend Pere, faites bien sçavoir a la Serenissime Infante Catherine que je luy souhaite les benedictions des plus serenissimes Princesses qui furent jamais, et sur tout la perseverance aux desirs fervens d'aymer de plus en plus Jesus Christ crucifié, qui est la benediction des benedictions.

0 mon Pere, on me presse, et il faut faire partir cet enfant, qui est vostre puisqu'il est mien, filz de mon frere, qui me le donna, mourant tout a fait comme un saint entre mes bras, comme l'autre mourut entre les vostres .

Je suis tout vostre, mon cher Pere, je dis tout vostre, sans reserve.

FRANçs, E. de Geneve.

Ce 12 octobre 1621.