Lettre MDCCCLXXXI. À la Comtesse de Miolans

Compassion et condoléances. - Le seul Consolateur. - Condition nécessaire pour la guérison des corps et des cœurs. - Les " troys douces paroles " de sainte Blandine. - Où se retirer à l'abri des maux de la terre. - François de Sales se réjouit du repos que Mme de Miolans a trouvé à la Visitation.

Annecy, 8 janvier 1622.

Madame,

Bien que je n'eusse pas eu le bonheur de vous connoistre quand j'eu la premiere nouvelle de vostre desplaysir, si est ce que je ne laissay pas d'estre vivement touché de compassion pour vostre cœur, m'imaginant combien forte avoit esté cette inopinee secousse ; et si mes souhaitz eussent esté autant pleins d'efficace comm'ilz le furent d'affection et de tendreté, je croy que des lors vous eussies ressenti quelque sorte de veritable alegement. Mays, Madame, les pensees des hommes sont vaynes ( Ps 93,11 ) et inutiles en elles mesmes ; Dieu seul est le Maistre et le Consolateur des cœurs, c'est luy seul qui apayse les ames de bonne volonté ( Lc 2, 14 ). Or, celles-la sont de bonne volonté esquelles Dieu met son bon playsir, et il met son bon playsir es ames qui, selon sa bonne volonté, esperent en luy.

Que ce fut un bon advis, Madame, que celuy que vous receutes de son inspiration, vous proposant de vous retirer pour un peu de la presse des consolateurs du monde, quoy que bons consolateurs, pour, en repos, remettre la playe de vostre cœur es mains du Medecin et Operateur celeste ! puisque mesme les medecins terrestres confessent que nulle guerison ne se peut faire sinon en la quietude et tranquillité. Les paroles interieures que Dieu dit au cœur affligé qui recourt a sa bonté sont

plus douces que le miel ( Ps 118,103 ), plus salutaires que le bausme praetieux a guerir toutes sortes d'ulceres. Le cœur qui s'unit au cœur de Dieu ne se peut empescher d'aymer et d'accepter en fin suavement les traitz que la main de Dieu descoche sur luy.

Vostre sainte Blandine ne treuvoit point de plus grand soulagement parmi les blessures de son martire que la sacree cogitation qu'ell'exprimoit souspirant ces troys douces paroles : " Je suis chrestienne. " Bienheureux est le cœur qui sçait bien employer ce souspir !

Madame, je vous dirois volontier, pour remede a vostre douleur, que qui veut exempter son cœur des maux de la terre, il le faut cacher dans le Ciel, et, comme dit David ( Ps 30,21 ), il faut musser nostre esprit dans le secret du visage de Dieu et dans le fonds de son saint tabernacle. Regardes bien a l'eternité a laquelle vous tendes; vous treuveres que tout ce qui n'appartient pas a cette infinie duree ne doit point mouvoir nostre courage. Ce cher filz est passé de ce monde a l'autre sous des bons auspices, a la suite de son devoir envers Dieu et le Roy : ne voyes plus ce passage qu'en l'eternité.

Madame, on me presse de donner cette lettre, qui est des-ja trop longue pour estre si peu consideré (sic). Je benis Dieu dequoy ces Seurs de Sainte Marie vous ont esté aggreables en cett'occasion de vostre retraitte, et de quoy il vous a fait faire ce choix pour cette petite retraitte. Je sçai qu'elles se tiennent pour avoir esté grandement honnorees et edifiees de vostre sejour parmi leur abjection, et glorieuses que Monseigneur l'Archevesque les ayt favorisees de son commandement qui, en toutes rencontres, leur doit estre tres cher, et particulierement quand il regarde a vostre consolation.

Je suis a jamais de tout mon cœur,

Madame,

Vostre tres humble et obeissant serviteur en Nostre Seigneur,

FRANçs, E. de Geneve.

VIII j[anvier 1622 ].

A Madame

Madame la Comtesse de Miolans.

A Lion.

Revu sur l'Autographe conserve à la Visitation de Voiron.