Lettre MCMVII. À la Mère de Chantal, a Alonne

Départ précipité d'une petite colonie de Religieuses. - Portrait de celles-ci. - Le document qu'elles emportent. - Une dame que le Saint aime particulièrement sans l'avoir jamais vue. - Occupations multipliées. - Messages rapides. - Vivre, travailler et se réjouir en Dieu.

Annecy, 23 avril 1622.

L'inopinee venue de M. Roland nous presse de despescher nos cheres Seurs, qui ne devoyent partir, selon nostre compte, que sur la fin de la semaine suivante. Et par ce que nous vous envoyons ma Seur Paule Hieronime Favrot qui de jour a autre attendoit de faire la Profession, affin de ne l'envoyer pas novice nous la recevons a Profession ce mattin; et soudain la ferons partir avec les autres troys, puisque il ny a pas lieu dans la carrosse pour plus de filles que pour 4 .

Vous connoisses des-ja ma Seur Marie Marguerite , de laquelle partant je n'ay rien a vous dire, sinon qu'elle s'en va tres joyeusement. Ma Seur Paule Hieronime est une tres bonne fille, propre a tout, de bon esprit et de meilleur courage ; ell'a autant de proprietés que la sauge, selon le mot de feu vostre filz de Torens . Ma Seur Françoise Augustine est une brebis de grande observance et devotion . Ma Seur Peronne Marie est toute pleine de desir de bien s'employer. Nous avions encor choysi ma Seur Françoise Agathe ; mays voyans qu'il ny avoit place que pour 4, nous avons un peu favorisé sa mere qui avoit de la tendreté sur son depart, et non elle, qui partoit de bon cœur comm'ell'est demeuree de bon cœur. Je leur ay baillé pour document, de ne rien rechercher et ne rien refuser dans la vie religieuse.

La bonne madame de Dalet est bienheureuse de vouloir cette vie-la; Dieu luy face la grace qu'y estant, elle ne recherche plus rien et ne refuse plus rien. Je ne l'ay jamais veu, mais j'ay un certain instinct interieur tout particulier pour elle et son esprit.

Je n'escris a personne sinon a nostre bon Monseigneur l'Evesque de Langres ; car, quel moyen de faire en une matinee tant de choses, puysque hier il fallut confesser ces nouvelles professes , et parler a M. Roland et faire mille choses ? Vous sçaves mon cœur pour Mme la Premiere , pour messieurs et mesdamoyselles de Vilers. Je salue tres humblement madame la Duchesse de Bellegarde , si ell'est la, et madame la Marquise de Termes , et suis leur tres obeissant serviteur. Au cœur de nostre madame de Tolongeon il ne faut dire mot, sinon qu'il escoute bien celuy de sa mere : c'est tout ce que son vieux Pere luy desire. A monsieur Roland tout le reste.

Je reviens de la Profession de nos Seurs, ma tres chere Mere, et pour faire partir nos Seurs qui vont a

vous, je finis cette lettre, vous recommandant toutes a la sainte grace de Nostre Seigneur. Dans peu, j'envoyeray a nostre Seur Marie Jaqueline tout ce qui luy est necessaire pour venir .

O Dieu, que c'est une bonne chose de ne vivre qu'en Dieu, ne travailler qu'en Dieu, ne se res-jouir qu'en Dieu ! Ainsy je salue vostre cœur, ma tres chere Mere, de tout le mien, qui est vostre. Amen. A Mlle Soyrot , Arviset , Binet , a toutes les ames qui me font lhonneur d'avoir soin de prier pour moy; a Mme du Puys d'Orbe , Amen.

XXIII avril 1622.

A ma tres chere Mere,

chez madame de Tolongeon.

Revu sur l'Autographe conservé à la Visitation de Rennes.