Lettre MDCCCLXXXVII. À la Présidente de Herse

Insuffisance des commissions verbales. - Devoir auquel l'Evêque ne manque pas.

Annecy, 23 janvier 1622.

Tay bien chargé ce porteur qu'il allast vous saluer, et monsieur vostre cher mary et vostre petit homme mon cher filleul , de ma part et tres humblement. Mays seroit il bien possible que je ne luy donnasse pas cette petite marque visible de la verité du desir que j'ay de vivre invisiblement en vostre chere ame, Madame ma chere Commere et ma Fille tres aymee ? Je ne cesse point, je vous asseure, et ne celebre jamais le saint Sacrifice que je ne presente vostre cœur a Dieu, et n'invoque sa protection et faveur sur vostre chere famille. Je le dois, je le sçai bien ; aussi ne le vous dis je pas, ma tres chere Fille, pour m'en vanter, mays pour la complaysance que j'ay a le penser, et a croire que je vous fay playsir de vous en asseurer. Or sus, c'est asses.

Vives donq de plus en plus en ce celeste amour de Nostre Seigneur qui vous y oblige par mille benedictions qu'il vous a donnees, et sur tout par l'inspiration qu'il vous a departie de le vouloir et de le desirer ; et, en ce desir, vivés joyeuse et saintement contente, voire mesme parmi les ennuis et les afflictions qui ne manquent jamais aux enfans de Dieu.

Je suis tout a fait invariablement

Vostre tres humble et tres obeissant serviteur et compere,

FRANçs, E. de Geneve.

A Annessi, le 23 janvier 1622.

A Madame

Madame la Presidente de Herce.

MDCCCLXXXVIII

A LA MÈRE DE LA ROCHE SUPERIEURE DE LA VISITATION D ORLEANS

Trois choses apportant à François de Sales de la consolation.- Affection mutuelle de l'Evêque d'Orléans et de l'Evêque de Genève. - Espérance qui sera surpassée. - Un porteur de lettres pas encore en route. - Fille de sainte qui deviendra sainte. - Les " douces Filles " du bienheureux Fondateur.

Annecy, 23 janvier 1622.

Les larmes receües par les mains de Mme de Royssieu , vostre lettre tout maintenant venue par la voye de Lyon, mais sur tout vostre dilection tesmoignee par l'un et l'autre moyen, ma tres chere Fille, me donnent un'extremement douce consolation. Monsieur Roland vous dira toutes les nouvelles que vous pourries desirer de deça, d'ou, comme je croy, plusieurs vous escriront plus amplement que moy qui n'en ay nul loysir; aussi est il a propos que je soys court, pour ne point divertir la consolation que vous aures a recevoir nostre bonne Mere.

Si faut il pourtant que je vous die que rien ne me pouvoit estre plus doux et aggreable en vostre lettre, que la bonne nouvelle que vous me donnés de la favorable souvenance que Monseigneur l'Evesque d'Orleans a de moy ; et bien que je sache que ce bien provienne de son bon naturel, qui est franc et genereux, si ne laisse je pas de le reconnoistre de Dieu, qui, m'ayant donné une singuliere affection envers ce Praelat, a voulu quil y eut en luy cette aggreable correspondance et qu'il eut une bonne inclination pour moy. Je connois certes en luy beaucoup d'excellentes qualités grandement propres au service de Dieu et de l'Eglise, lesquelles il faut esperer devoir estre egalement utiles quand elles seront bien employees, ainsy qu'il commence a les rendre par la praedication, et qu'il continuera sans doute tous-jours plus fructueusement. Ce luy sera un grand bien de s'obliger a la vie apostolique par cette solemnelle action de l'authorité apostolique. Je sçai la grande esperance que son peuple a de luy, et je sçai que sil l'entreprend il la surpassera; et son courage le luy fera entreprendre. J'ay grande envie de luy escrire, mais il ny a moyen maintenant, tant je suis accablé; et cependant je vous prie, ma tres chere Fille, de luy baiser tres humblement les mains de ma part, l'asseurer de mon fidele service et, sans en faire semblant, sçavoir dextrement de luy sil aura aggreable que je luy escrive par foys.

Nostre chere et cordiale Seur Prieure des Carmelites recevra, je m'asseure, le chapelet et ma lettre par monsieur Jantet, a qui, si je m'en souviens bien, je remis le tout ( note 317 ) ; et n'estant pas encor parti de Beley, ce n'est pas merveille si ni elle ni vous ne l'aves encor pas receu. Cependant, je salue tres cherement le cœur de cette fille bienaymee, qui sera sainte aussi bien que sa mere, si mes souhaitz sont exaucés; et si nostre bonne Mere la peut voir entrant en la ville ou sortant, j'en. seray consolé: aussi luy escris je ( note 530 ) que cette chere Seur est mon ancienne et partiale fille. Je salue aussi tres affectionnement et intimement la Mere Sousprieure , qui sçait bien que Dieu veut que je la cherisse comme je fay.

La fille qui accompagna icy Mme de Royssieu me demanda une recommandation pour elle envers vous, et je la luy donnay comme a une fille l'humeur et l'interieur de laquelle je ne connoy nullement. Vous entendres bien ce que je desire, qui est sur tout le bien et la consolation de vostre Mayson.

Je confesse que j'ay grand tort de ne point escrire a ma Seur Marie Michele , que j'ayme neanmoins de tout mon cœur; ni a ma Seur Marie Françoise Belet, que j'affectionne grandement non seulement par ce qu'ell'est ma fille, mays par ce qu'ell'estoit chere a la bonne Mme Le Blanc ; ni a ma petite fille Anne Marguerite Clement qui, a la verité, est grandement bienaymee de mon ame, nonobstant la petite duplicité des scrupules qu'elle me demanda avant son depart .

Or sus, ce sont toutes mes douces Filles en Nostre Seigneur, que je supplie continuellement de les rendre tout a fait saintes; et vous de mesme, ma tres chere Fille, a qui je suis tres entierement tout dedié et, en verité, tres cordialement vostre. Amen.

Le XXIII janvier 1622.

A ma tres chere Fille en N. S.,

Ma Seur Claude Agnes de la Roche,

Supere de la Visiton de Ste Marie.

Orleans.

Revu sur l'Autographe conservé à la Visitation de Rennes.