Lettre MDCCCXCIII. À la Comtesse de Dalet

Sages limites d'un désir. - Comment Dieu emploiera " une tentation de l'ennemy, " et quand il en délivrera. - Les pensées d'amour-propre ne peuvent nuire à une âme qui considère souvent son néant. - Promesse de prières.

Annecy, 8 février 1622.

Madame,

Je respons a nostre chere Seur Superieure de Montferrant sur ce que vous me proposes par vostre lettre, bien marri que, pour ce qui regarde sa personne, je ne puis pas seconder le desir de madame de Chazeron ; car, quant au vostre, Madame, je sçai bien les limites dans lesquelles vous le contenes affin que le service de Dieu soit en toutes occasions purement prattiqué : c'est pourquoy je ne vous fay point d'excuse.

Quant a la crainte de la mort et de l'enfer qui afflige vostre chere ame, c'est veritablement une tentation de l'ennemy, mais que l'Amy bienaymé de vostre cœur employera par sa bonté a vostre progres en la pureté et humilité. Et quand, par une entiere sousmission et resignation a sa providence, vous vous despouilleres du soin du succes de vostre vie, mesme eternelle, es mains de sa douceur et de son bon playsir, il vous delivrera de cette peyne, ou vous donnera tant de force pour la supporter que vous aures sujet d'en benir la souffrance.

Ma tres chere Fille, les suggestions de vantance, ouy mesme d'arrogance et outrecuydance, ne peuvent nuire a une ame qui ne les ayme pas, qui tous les jours dit souvent a son Dieu, avec le Roy David ( Ps 72,22 ) : Seigneur, je suis fait comme un neant devant vous, et je suis tous-jours avec vous. Comme s'il eust voulu dire : Je vous regarde, O souveraine Bonté, comme l'Estre infini, et me regardecomme un neant devant vous ; et bien que vous soyes tel et moy telle, je demeure tous-jours pleyne de confiance avec vous. Mon neant espere en vostre douce infinité avec d'autant plus d'asseurance que vous estes infini; j'espere en vous, en comparayson duquel je suis un vray neant.

Ma chere Fille, demeures en paix dedans vostre amertume ( Is 38,17 ). Vous sçaves bien en la pointe de vostre esprit que Dieu est trop bon pour rejetter une ame qui ne veut point estre hypocrite, quelles tentations et suggestions qui luy arrivent. Or sus, je recommanderay vostre necessité a ce grand Dieu d'affluence et d'abondance, et ce pendant, souspires souvent devant luy doucement vos intentions: Je suis vostre, O Seigneur, sauvés moy ( Ps 118,94 ). Il le fera, ma tres chere Fille. Et qu'a jamais son saint Nom soit beni.

Je suis sans reserve, Madame,

Vostre tres humble et tres fidele serviteur,

FRANçs, E. de Geneve.

Le 8 febvrier 1622, Annessi.