Skip to the text

Lettre MDCCCXCIX. À Madame Angélique Arnauld Abbesse de Port-Royal, a Maubuisson

(INÉDITE)

Les nouvelles que le Saint attend. - .Pourquoi il a " bien envie de revoir " la Mère de Chantal. - Salutations affectueuses à Mme Arnauld et à ses enfants.

Annecy, [fin février] 1622.

O ma tres chere Fille, ce ne seront plus meshuy des lettres entieres, ains seulement des billetz, jusques a ce que vous me donnies des nouvelles selon mon cœur. Certes, c'est bien tous-jours le desir de mon cœur que vous m'escrivies franchement selon le vostre ; mays les nouvelles du vostre seront selon [le] mien quand vous m'advertires ou que vostre affaire est passee a Rome, si Dieu le veut ainsy, ou que si elle ne peut passer a Rome vous demeures accoysee, employant au soulagement de vos desirs les permissions que vous aves et les autres remedes qu'en ce cas-la je vous diray, Dieu aydant, selon quil plaira a la Providence souveraine de sa divine Majesté de me suggerer et de vous inspirer. Il m'est advis, ma tres chere Fille, que mon esprit parlera au vostre d'un nouvel air quand je sçauray que la determination de vostre affaire sera tout a fait prise. Or sus, cependant humilies vous sous la main de Jesus-christ qui vous a tiree par sa misericorde a soy.

J'ay bien envie de revoir nostre bonne Mere, pour plusieurs bonnes raysons, mays entr'autres, affin d'apprendre des nouvelles bien particulieres de vostre cœur, qu'elle m'apportera pliees dedans le sien. Cependant, je salue tres humblement vostre bon Ange, ma tres chere Fille, et le supplie de vous bien proteger sous la faveur de l'amour celeste.

Je salue madamoyselle vostre chere mere , que j'ay tous-jours cheri filialement des que je l'ay conneue ; nostre tres chere seur Le Maistre , que je prie Dieu vouloir establir en l'amour du martire que son soin luy peut et doit donner ; madame la Coadjutrice de Port Royal , que Dieu veuille rendre sainte par la tressainte et courageuse humilité, et toutes nos autres Seurs qui sont tousjours au milieu de mon ame, notamment nostre Seur Anne, et nostre Seur Marie, et nostre petite seur Magdeleine, et nostre frere Simon .

Un petit mot a ma Seur Marie Angelique de Thou et a toutes les autres ; M. Manceau et le bon Pere Jean y auront leur part. Helas ! je prieray bien pour la pauvre Seur Isabelle .

A Madame

[Madam]e l'Abbesse de Port Royal.

Revu sur l'Autographe appartenant à M. l'abbé Welhen, aumônier de l'Orphelinat de Bellevue (Seine-et-Oise).

Chapter 158 of 221