Lettre MDXLII. À Madame Angélique Arnauld, Abbesse de Port-Royal a Maubuisson

Cinq avis au sujet d'une confession générale. - Par quel motif la faire. Se laisser à la Providence. - Assurance d'union éternelle.

Paris, 8 août 1619.

Dieu soit beni, ma tres chere Fille, de la tressainte bonté qu'il exerce envers vostre coeur, que le mien, en verite, cherit, ce me semble, tout incomparablement et vrayement comme soy mesme.

Au premier point, je dis que vous fassies donq cette confession ; au second, que vous vous y preparies par maniere d'une amoureuse humilité ; au troysiesme, si vous voules faire quelques marques sur le papier, que je l'appreuverois, mais sans anxieté ; au quatriesme, que cela se face en un jour, c'est a dire en troys ou quatre heures d'un jour, car cela suffit ; au cinquiesme, que vous changies de motif, car je vous connois, a mon advis, fort entierement. Faites le donq pour cette bienaymee humilité, et pour animer d'une forte resolution l'offrande et totale remise de vostre esprit es mains du Pere eternel. Il ne faut point d'autre preparation qu'une humble, mays noble et courageuse confirmation des mouvemens, resoluttons et propositions que nos exercices ont excité en nostre esprit.

Je ne suis ni gueri, ni malade ; mais je pense que bien tost je seray tout a fait le premier. O mon Dieu, ma tres chere Fille, il faut laisser nostre vie et tout ce que nous sommes a la pure disposition de la divine Providence ; car en somme, nous ne sommes plus a nous mesmes, ains a Celuy qui, pour nous rendre siens, a voulu d'une façon si amoureuse estre tout a fait nostre.

J'attens response de Monseigneur le [Prince de Piémont], et j'espere que ce sera pour mon retour , auquel mon ame me presse grandement a cause de mon devoir ; et ne puis m'imaginer que ni retour, ni chose quelcomque me puisse jamais separer de vous: non, ni mesme la mort, puisque nostre union est en Celuy qui ne meurt plus ( Rm 6,9 ). Mais tous-jours je vous iray voir, ou avec N. ou seul ; car il faut que je le face.

Et tandis, Dieu soit a jamais au milieu de vostre cœur, et je suis invariablement

Vostre tres humble frere et serviteur,

FRANÇs, E. de Geneve.

Ce 8 aoust 1619.