Lettre MDCCCL. À Monsieur et Madame de Foras

" Un petit feu de joye " sur le gain d'un procès. - Sainte exhortation à persévérer dans l'union mutuelle .

Annecy, novembre 1621.

Mille et mille benedictions a Dieu, dequoy en fin, Monsieur mon tres cher Frere et Madame ma tout a fait tres chere Seur ma Fille, vous voyla exemptz de ces fascheux proces, par lesquelz, comme parmi des espines, Dieu a voulu que les commencemens de vostre heureux mariage se soyent passés . M. de Chalcedoine, mon frere, et moy en avons fait un petit feu de joye, comme participant a tout ce qui vous regarde.

Or sus, bien que vostre grossesse vous incommode un peu sensiblement tous deux, ma fille qui la sent, et mon tres cher frere qui la ressent, il me semble toutefois que je vous voy tous deux avec deux cœurs si contens et si courageux a bien servir Dieu, que ce mal mesme que vous sentes et ressentes vous console ; comme marque que, n'ayant pas exemption entiere de toute affliction en ce monde, vostre parfaite felicité vous est reservee au Ciel, ou je m'asseure que vous aves vos principales pretentions.

O mon tres cher Frere, continues a bien soulager par vostre aymable presence ma tres chere fille. O ma tres chere Seur, perseveres a bien lier mon tres cher frere a vostre cœur, car, puisque Dieu vous a donnés l'un a l'autre, soyes donq bien tous-jours comme cela ; et croyes bien tous deux que je suis, de l'un et de l'autre, mon tres cher Frere et ma tres chere Fille ma Seur,

Tres humble et invariable serviteur,

FRANçs E. de Geneve.

D'Annessi, ce 11 novembre 1621.

Je vous prie de saluer cherement de ma part madamoyselle de Lamoignon . S'il vous arrive quelque commodité, mon tres cher Frere, de voir Mme de Soret , je vous supplie de me ramentevoir en sa chere et sainte bienveuillance.

A Monsieur de Foras.

A Paris.