Lettre MDCCCXLVIII. Au Père Étienne Binet, de la Compagnie de Jésus

Les désirs de Mme de Port-Royal d'entrer à la Visitation. - Conduite du Saint en cette affaire; à qui il en a remis la solution. - Eloge de la virilité de l'Abbesse. - Pureté de vues et désintéressement du Fondateur ; sa démission de ses propres pensées.

Annecy, 11 novembre 1621.

Mon Reverend Pere,

Avec mille actions de graces de la peine que vous aves prise a m'escrire, je vous diray pour response, qu'estant a Paris, je ne voulus jamais acquiescer au desir que Madame de Port Royal me tesmoigna de se retirer de l'Ordre auquel elle avoit si utilement vescu jusques alhors, et veritablement, je n'apportay en ce païs non pas mesme aucune cogitation de cela ; mais, coup sur coup, je receu par lettres force bonnes remonstrances par lesquelles elle m'excitoit a treuver bonnes ses pensees et appreuver ses souhaitz. Je gauchis tant que je peus et ne me tesmoignay seulement froid, mais tout a fait contraire a ses propositions ; jusques a ce qu'apres dixhuit moys, une personne de grande consideration m'escrivit en sorte que je jugeay convenable de ne point faire le juge souverain en cette occasion, ains de laisser la decision finale a l'evenement. Je m'abstins donq de la conseiller, et luy escrivis que, puisque son cœur ne treuvoit pas du repos en tout ce que je luy avois dit et escrit, elle pourroit faire faire la sollicitation de ce qu'elle desiroit. Que si Sa Sainteté luy en faisoit la concession, il y auroit une tres probable apparence que son desir est de la volonté de Dieu, attendu que la chose estant de soy mesme difficile, elle ne pourroit reuscir sans un special concours de la faveur divine ; que si, au contraire, Sa Sainteté l'esconduisoit, il n'y auroit plus autre occasion de faire autre chose que de s'humilier et appayser son cœur. Voyla, mon Reverend Pere, jusques ou j'ay passé.

Je voyois bien que cette praetention estoit extraordinaire, mais je voyois aussi un cœur extraordinaire ; je voyois bien l'inclination de ce cœur a commander, mais je voyois que c'estoit pour ruiner cett' inclination qu'elle vouloit se lier a l'obeissance ; je voyois bien que c'estoit une fille, mais je voyois qu'elle avoit esté plus que fille a commander et gouverner, et qu'elle le pourroit bien estre a bien obeir.

Pour l'interest de la Visitation, certes, mon Reverend Pere, je proteste devant Dieu et devant Vostre Reverence que je n'y pensay nullement, ou si j'y pensay, ce fut si peu que je n'en ay nulle memoire. Je confesse bien que j'ay une particuliere dilection pour l'Institut de la Visitation ; mais madame de Chantal, vostre chere fille et la mienne, vous dira que pour cela je ne voudrois pas avoir fourvoyé la plus excellente creature du monde et la plus accreditee, de sa juste vocation, encor qu'elle deut devenir sainte canonizee en la Visitation. Je me res-jouis quand Dieu y tire des bons sujetz, mais je n'employay jamais ni parole ni artifice, pour saint qu'il fut, pour en attirer aucun, sinon quelques foibles prieres devant Dieu. L'inconstance des filles est a craindre, mais on ne peut pas deviner ; et la constance en celle cy est esgalement, ains advantageusement, a bien esperer.

Mon Dieu, mon Pere, que nostre ancienne amitié me fait extraordinairement apprivoiser et espancher mon ame avec la vostre ! C'est trop. Je me laissay aller a l'advis d'autruy; je m'en retourneray aussi volontier a l'advis de ceux qui prendront la peine d'examiner cette affaire, mais sur tout au vostre, lequel donq j'attendray tres affectionnement et recevray tres cherement, estant a jamais,

Mon Reverend Pere,

Vostre tres humble et tres affectionné confrere et serviteur,

FRANçs, E. de Geneve.

XI novembre 1621, Annessi.

Au R. P. Estienne Binet,

Superieur de la Mayson professe de St Louys

de Paris.

Revu sur une ancienne copie conservée dans la salle capitulaire de Notre-Dame de Paris.