Lettre MCMIX. À la Mère Favre Supérieure de la Visitation de Montferrand

Plusieurs lettres pour une même affaire. - La Mère Favre, après avoir établi le Monastère de Dijon, doit venir fonder celui de Chambéry. - Bonté de Dieu qui facilite la retraite de Mme de Dalet. - Conseils pour la visite canonique. - Avis différents, donnés par l'Evêque de Genève sous l'inspiration divine.

Annecy, 26 avril 1622.

Tenes, ma tres chere Fille, voyla deux lettres pour Monseigneur de Clermont , l'une du bon monsieur vostre pere, l'autre de moy, qui tendent a mesme fin ; vous les verres toutes deux, et, s'il vous plait, les cachetteres, et apres que le cachet sera sec, vous les luy rendres. Voyla vostre obeissance sans date . Voyla encor la lettre que monsieur vostre pere vous escrit et celle qu'il m'escrit a moy, par lesquelles vous verres comme tout se dispose a la fondation d'un Monastere a Chamberi ; et tandis que pour le commencement on fera preparer les logis, nostre Mere pourra y estre, et vous a Dijon, affin que, comme en passant, vous y establissies cette Mayson-la avant que de venir establir celle de Chamberi ( note 500 ) : et ainsy sera vray tout ce que nous escrivons a Monseigneur de Clermont.

Je ne voy nulle sorte de difficulté en l'affaire de la bonne madame de Dalet, et me semble qu'il n'est point necessaire d'employer le tems a voir comme reüscira la remise de ses enfans entre les mains de M. et Mme de Monfan ; car il suffit de bien pourvoir a la personne et au bien maintenant, et d'avoir une tres probable conjecture que tout ira bien. Dieu n'est il pas bon, ma tres chere Fille, d'avoir ainsy explané le chemin de la retraitte a cette chere ame, laquelle, comme vous sçaves, je ne connois pas; mais j'ay certain secret instinct pour elle, qu'il ne se peut dire combien elle m'est chere. Je suis bien ayse que vous la soulagies de vostre presence en cette affaire ; nostre Mere, ce pendant, sera vostre avant courriere a Dijon et puis a Chamberi.

En la Visite , on pourra bien se dispenser es pointz moins essentielz. Vous pourres mesme, si vous le juges a propos, procurer dextrement que l'on commette quelques personnes qui ayent le loysir et la volonté entiere : comme seroit quelque bon Pere Jesuite, ou quelque Pere de l'Oratoire, ou quelque bon ecclesiastique. Je me res-jouis dequoy cette Mayson-la est pleine de bonnes filles ; celle qu'a mon advis vous voules laisser en vostre place, m'a escrit, et je luy respons *.

Je respons aussi a madame Bonnefoy et luy desire une tres bonne charité . C'est la verité que son esprit estant de la condition que vous me marqués, elle doit moins faire de consideration a se retirer et mettre a l'abry. Je fay chercher la lettre de madame de Chazeron pour l'envoyer. Hier j'eus icy une damoyselle de grans moyens, nullement propre au mariage , et neanmoins je ne sceus jamais luy conseiller la Religion a laquelle elle avoit pensé, qui estoit la Visitation, ni aucune autre, ains la renvoyay au mariage; et aujourd'huy je ne puis conseiller le mariage ni a madame [ de] Dalet, ni a madame Bonnefoy, ains suis tout a fait tiré a leur proposer la Religion. O que madame [de] Dalet est heureuse d'avoir un esprit si ferme au desir de la perfection du saint amour ! Je la salue tres cordialement, et toutes nos Seurs; mais vostre chere ame, ma Fille bienaymee, je la salue de toute l'estendue des affections de la mienne, qui suis

Vostre tres humble et inseparable frere et serviteur,

FRANçs, E. de Geneve.

26 avril 1622.