Lettre MCMXIII. Au Prince de Piémont, Victor-Amédée

La protection des convertis, premier but de la Sainte-Maison de Thonon. Ce qu'il advient pour la pension annuelle due au sieur de Corsier; moyen d'en faciliter le payement.

Annecy, 2 mai 1622.

Monseigneur,

Puysque ça esté l'intention de Son Altesse que la Sainte Mayson de Thonon servit de refuge a ceux qui, de l'heresie, se convertiroyent a la sainte religion catholique, et que pour cela ell'a commandé par lettre expresse, et par mon entremise, encor, que, des revenuz d'icelle Sainte Mayson, fussent donnés cinquante escus d'or de pension annuelle au sieur de Corsier , gentilhomme bien nay qui, despuys sa conversion qu'il fit entre mes mains, a tous-jours vescu fort vertueusement en bon ecclesiastique, apres avoir perdu tous ses biens, il recourt a Vostre Altesse Serenissime, affin qu'il luy playse de luy faire effectivement joüyr de ce bienfait que la Sainte Mayson ne nie pas luy estre deu, mays qu'elle dit ne pouvoir payer, parce que les deniers que Son Altesse luy a assignés pour sa fondation manquent.

Or, Monseigneur, le sieur Gilette estant en cour et ayant charge des affaires de la Sainte Mayson, je croy que si Vostre Altesse luy commande efficacement de faire treuver laditte pension, il le pourra bien faire. Et si d'ailleurs les Peres de l'Oratoire entrent en la Sainte Mayson, on espargnera les gages que l'on donne aux ecclesiastiques seculiers qui y sont maintenant, et de cette espargne on pourra payer cette pension et faire plusieurs autres bonnes affaires : qui sont les deux moyens que je voy, quant a present, plus propres pour remedier a la miserable pauvreté de ce gentilhomme, pourveu qu'il playse a Vostre Altesse que bien tost on les prattique, ainsy que tres humblement je l'en supplie,

Monseigneur, qui suis,

Vostre tres humble, tres fidele et tres obeissant orateur et serviteur,

FRANçs, E. de Geneve.

2 may 1622, Annessi.

Revu sur l'Autographe appartenant à M. Deschamps à Rouen.

.MCMXIV

AU PRINCE CARDINAL MAURICE DE SAVOIE

(INEDITE)

Misère et piété dignes d'être secourues.

Annecy, 2 mai 1622.

Monseigneur,

Je n'ose et ne doy pas aussi oser escrire a Vostre Altesse Reverendissime que pour des occasions pressantes.

Ce pauvre gentilhomme ecclesiastique desire, forcé de necessité, une grace de Vostre Altesse, selon que le R. P. Monod vous representera, Monseigneur. Et pour moy, je n'adjousteray rien, sinon que veritablement la misere de ce personnage est digne de vostre misericordet et sa pieté digne d'estre pitoyablement secourue.

Ce pendant, faysant tres humblement la reverence a Vostre Altesse, et priant Dieu qu'il la comble de toute sainte fœlicité, je demeure,

Monseigneur,

Vostre tres humble, tres fidele, tres obeissant orateur et serviteur,

FRANçs, E. de Geneve.

2 may 1622, Annessi.

Revu sur l'Autographe conservé à Cherasco (Piémont), dans les archives de l'église Saint-Pierre.